اطلاعات روز: د ترکیې بهرنیو چارو وزیر مولود چاوش اوغلو وایي، چې له ملګرو ملتونو او قطر او امریکا هېوادونو سره له سلا مشورو وروسته، د افغان سولې په اړه د استانبول ناسته له روژې میاشتې او کوچني اختر وروسته ته وځنډېده.
د ترکیې بهرنیو چارو وزیر د ترک خبر (Habertürk) ټلوېزیوني شبکې سره خبرو کې ویلي، چې د دې ناستې د ځنډېدو پرېکړه، له افغانستانه د امریکایي ځواکونو وتلو رسمي اعلان له امله شوې ده.
د اناتولي خبري اژانس د اوغلو له دې مرکې په قول راپور کړی دی: «له افغانستانه د امریکایي ځواکونو وتلو له پرېکړې وروسته، لازمه نه ده چې بېړه وکړو. د پلاوو جوړښټ او چمتوالي پړاوونو له نظره د کنفرانس ترسره کېدو شاته غورځېدنه به ګټوره وي.»
له بلې خوا، نوموړي د استانبول ناستې په ګډون د افغان سولې په اړه په نورو ناستو کې د طالبانو نه ګډون اعلان ته په اشارې ویلي، چې له طالبانو پرته د دې ناستې ترسره کول کومه مانا نه لري.
د ترکیې بهرنیو چارو وزیر ټینګار کړی، دا چې تراوسه پلاوي جوړ شوي نه دي او د استانبول ناسته ک د ګډون په اړه روڼتیا نشته، پرېکړه شوې چې د هغې ترسره کولو پورې وځنډېږي.
دغه راز د هغه په وینا، د استانبول ناسته کې ټاکل شوې چې ۲۱ هېوادونه او درې نړیوال سازمانونه دغه راز د افغانستان دولت او د طالبانو ډلې خواوې ګډون وکړي. دغه ناسته به د ترکیې ولسمشر رجب طیب اردوغان پرانیزي.
ټاکل شوې وه چې د استانبول ناسته د اپرېل په ۲۴مه جوړه او د مې تر څلورمې دوام وکړي. له دې وړاندې د ترکیې بهرنیو چارو وزارت ویلي و، چې دا ناسته د د ترکیې، قطر او ملګرو ملتونو په ګډ کوربه توب او په لوړه او هر اړخیزه کچه، د افغانستان اسلامي جمهوریت او طالبانو ډلې په استازولۍ ترسره کیږي.
د دې ناستې اصلي موخه د افغان سولې لړۍ چټکتیا، دوحه کې د بین الافغاني خبرو اترو بشپړېدل او یو عادلانه او تلپاتې سیاسي هوکړې ته لاسرسی دی.
