اطلاعات روز: د ملګرو ملتونو ښځینه څانګې له طالبانو غوښتي، چې د دې سازمان دفترونو ته د ښځینه کارکوونکو د تګ بندیز ختم کړي، څو مرستې ښځو او نجونو ته ورسېږي.
دغه سازمان نن (یکشنبه، ۱۶ د لیندۍ) په یوه بیان کې ویلي، درې میاشتې تیریږي چې په ټول هیواد کې د ملګرو ملتونو ودانیو ته د ښځینه کارکوونکو داخلیدل بند شوي دي.
په افغانستان کې د ملګرو ملتونو د ښځینه څانګې ځانګړې استازې سوزان فرګوسن ویلي، چې په دې ۹۱ ورځو کې ښځینه کارکوونکو د خپلو کورونو څخه د افغانانو لپاره خپل حیاتي کار ته دوام ورکړی دی.
هغې زیاته کړې، چې افغان ښځې د ملګرو ملتونو د کار لپاره په افغانستان کې اړینې دي، او دا سازمان یوازې د هغوی د شتون له لارې کولای شي ښځو او نجونو ته لاسرسی ومومي او مرستې ورسوي.
د ملګرو ملتونو دې چارواکي ټینګار کړی، چې مرستې باید د ښځو له لوري ښځو ته وړاندې شي.
ملګرو ملتونو ویلي، چې د طالبانو له محدودیتونو سره په کلکه مخالف دي؛ ځکه دا محدودیتونه د بشري حقونو او د ملګرو ملتونو د بنسټیزو اصولو او برابریو خلاف دي چې د دې سازمان په منشور کې ذکر شوي او همداراز د دې توان کمزوری کوي چې خپلې دندې په سمه توګه ترسره کړي.
د ملګرو ملتونو د ښځینه څانګې استازې ویلي: «موږ د افغان ښځینه کارکوونکو او قراردادیانو د ننوتلو پر بندیز د لېرې کولو غوښتنه کوو او ټینګار کوو چې هغوی باید د ملګرو ملتونو دفترونو او ساحو ته خوندي لاسرسی ولري، څو مرستې هغو ښځو او نجونو ته ورسېږي چې تر ټولو ډېرې اړتیا ورته لري.»
طالبانو درې کاله دمخه په غیر دولتي سازمانونو کې ښځې له کار منعه کړې، چې ملګري ملتونه هم پکې شامل دي او دا بندیز تر اوسه پورې دوام لري.
