اطلاعات روز: له ننګرهار څخه سیمه ییزې سرچینې وایې د دې د خوګیاڼیو ولسوالۍ په «خواران» سیمه کې ناپېژاندو وسلوالو یو ځوان په ډزو وژلی دی.
سرچینې زیاته کړې چې د ابراهیم په نوم دا ځوان د چهارشنبې په شپه (۶ د وږي) خپل کور ته څېرمه وژل شوی دی.
د سرچینې د معلوماتو له مخې، وژل شوي ځوان د څارویو سوداګري کوله او هیچا سره یې شخصي دښمني نه درلوده.
بلخوا ننګرهار کې د طالبانو د پولیسو ویاند سید طیب حماد هم د یاد ځوان وژنه تاییدوي او وایې چې یاد کس د خپل کور مخې ته د ناڅرګنده وسلوالو له لوري وژل شوی او دوی یې په اړه څېړنې کوي، خو هغه په دې اړه نور جزییات نه دې ورکړي.
د یادونې وړ ده چې په دې وروستیو کې د ننګرهار په مرکز او ولسوالیو کې د جنايي جرمونو کچه لوړې شوې چې عام خلک یې اندېښمن کړي دي.
