اطلاعات روز: په داسې حال کې چې افغان نجونې له زده کړو محرومې دي، په کابل کې د اروپايي ټولنې دفتر د ځوانانو د مهارتونو د نړیوالې ورځې په مناسبت ویلي، چې دا نجونې د محدودیتونو پر ځای د ډیرو فرصتونو مستحقې دي.
د اروپايي ټولنې دفتر زیاته کړې، چې له خپلو شریکانو سره ګډ کار کوي، څو ځوانو ښځو او نجونو ته د زدهکړې، کار او پرمختګ اړین مهارتونه او ملاتړ برابر او وکولای شي خپلې ټولنې د روښانه راتلونکي پر لور رهبري کړي.
طالبانو پر افغانستان د ولکې ټینګولو وروسته د ښځو او نجونو پر زده کړو او کار سخت بندیزونه لګولي دي.
اوس مهال نجونې اجازه نه لري چې له شپږم ټولګي څخه پورته زده کړې وکړي. طالبانو په دولتي دفترونو کې ښځې له کار کولو منع کړي دي او د ښځو پر بېلابېلو کسبونو یې محدودیتونه لګولي دي.
سره له دې چې د طالبانو پر یادو پالیسیو نړیوال نیوکې کوي، خو له دې سره سره یادې ډلې خپل محدودیتونه سخت کړي دي.
اروپایي ټولنې د ځوانانو د مهارتونو په نړیواله ورځ ویلي، چې دوی د افغان ځوانانو سره ولاړ دي او په هغو مهارتونو پانګونه کوي چې د کار فرصتونه رامنځته کړي.
اوس مهال په افغانستان کې بې کاري یو جدي بحران دی. د دې بحران له امله د افغان ځوانانو یوه لویه برخه بهر ته کډوالۍ ته اړ ایستل کېږي. په ورته وخت کې د افغانستان ګاونډي هیوادونه افغان کډوال او د کار غوښتونکي له خپلو هیوادونو شړي او دا مهال له ایران څخه د کډوالو د شړلو لړۍ په شدت سره روانه ده.
