اطلاعات روز: د طالبانو د بهرنیو چارو وزارت سرپرست امیر خان متقي د ملګرو ملتونو د سرمنشي له ځانګړې استازې، رزا اوتنبایوا څخه غوښتي چې «خپلو راپورونو کې پر واقعیتونو تمرکز وکړي تر څو په هیواد کې راغلي پرمختګونو او هر اړخیز ثبات له نړیوالو سره شریک شي».
د طالبانو د بهرنیو چارو وزارت نن سهار (پنج شنبه، ۱۵ د غبرګولي) خبر ورکړی، چې متقي په کابل کې د یوناما له رییسې سره کتلي دي.
د طالبانو د بهرنیو چارو وزارت د خبرپاڼې له مخې، د یوناما رییسې ژمنه کړې چې د ملګرو ملتونو او امنیت شورا په راتلونکو غونډو کې به له نړیوالو سره په افغانستان کې د راغلو پرمختګونو او فرصتونو په تړاو معلومات شریکوي او د طالبانو د حکومت پیغامونه به رسوي.
ټاکل شوې چې د ملګرو ملتونو امنیت شورا به راتلونکې میاشت د افغانستان په اړه یوه غونډه وکړي. رزا اوتنبایوا به په دې غونډه کې د افغانستان د وضعیت په اړه راپور ورکړي.
د طالبانو د بهرنیو چارو وزارت خبرپاڼې له مخې، متقي او رزا اوتنبایوا په دغه کتنه کې د راستنېدونکو کډوالو پر اړتیاوو، د نړۍ په ګوټ ګوټ کې د میشتو افغانانو پر ستونزو، په هیواد کې راغلو پرمختګونو، د خصوصي سکتور پر ودې، د پانګونې پر جلب خبرې کړې دي.
دغه راز متقي د یوناما د دوامدارو مرستو ستاینه کړې او د همکارۍ ډاډ یې څرګند کړی دی.
هغه ټینګار کړی چې د طالبانو حکومت باید وکولی شي په اروپا کې د میشتو افغان اتباعو ستونزو ته لاسرسی ومومي ترڅو دوی ته قونسلګري خدمات چمتو شي او د دوی قانوني ستونزې حل شي.
هغه ټینګار کړی، چې په اروپا کې د میشتو افغانانو ستونزو ته دې د طالبانو د حکومت لاسرسی ممکن شي، تر څو هغوی ته د قونسلي خدماتو په وړاندې کولو سره د دوی حقوقي موضوعات حل او له بشري حقونو یې دفاع رامنځته شي.
رزا اوتنبایوا د طالبانو او په ځانګړې توګه د دې ډلې د بهرنیو چارو وزارت د همکاریو مننه کړې او ټینګار یې کړی چې ملګري ملتونه د افغانانو ترڅنګ ولاړ دي.
هغې زیاته کړې، چې یوناما هڅه کوي چې راستنېدونکو کډوالو ته د ژوند اسانتیاوو سربېره په افغانستان کي د کاري فرصتونو د رامنځته کېدو په برخه کې د پانګونې جلب ته زمینه برابره کړي.
د یوناما رییسې یادونه کړې، چې له افغانستان سره د نړیوالو مرستې د بشري برخې سربېره انکشافي برخو ته هم غزېدلي دي.
دا په داسې حال کې ده، چې د ملګرو ملتونو مرستندویه ادارې وايي چې دوی د بودیجې له سخت کمښت سره مخ دي.
د امریکا له خوا د مالي مرستو له بندولو وروسته، د افغانستان د بشري مرستو رسولو پروګرام د بودیجې له سخت کمښت سره مخ شوی دی.
د ملګرو ملتونو د بشري چارو د همغږۍ دفتر (OCHA) وايي، چې په افغانستان کې ۲۹۸ د خوړو مرکزونه د بشري تمویل د نشتوالي له امله تړل شوي دي.
