اطلاعات روز: د پاکستان پوځ اعلان کړی چې پر دې هیواد د هند د وروستیو بریدونو په ترڅ کې ۴۰ ملکي وګړي او ۱۱ سرتېري وژل شوي دي.
د ډان ورځپاڼې له راپور سره سم، د پاکستان د پوځ رسنیزې څانګې نن (سېشنبه، ۲۳ د غوایي) همدا راز ویلي چې په دې لړ کې ۱۲۱ ملکیان او ۷۸ نظامي کسان ژوبل شوي هم دي.
د دې رسنۍ له راپور سره سم، پاکستان ویلي چې په وژل شویو ملکیانو کې اووه ښځې او ۱۵ ماشومان شامل دي.
د پاکستان پوځ همد اراز ویلي چې په وژل شویو نظامیانو کې شپږ لوړپوړي غړي کسان دي او پنځه د هوایي ځواکونو غړي دي.
د هند او پاکستان تر منځ تاوتریخوالی د هند تر کنټرول لاندې کشمیر کې پر سیلانیانو تر برید وروسته زیات شو.
هند پاکستان په دې برید کې په لاس لرلو تورن کړ او د روانې میلادي میاشتې پر اوومه یې د «سیندور» په نوم عملیاتو په لړ کې د پاکستان تر کنټرول لاندې کشمیر او یو شمېر نورې سیمې په توغندیو وویشتلې.
تر دې وروسته له دواړو لورو پر پوله هم شخړه روانه وه، پاکستان د ځوابي برید په ترڅ کې پر هند ګوزارونه وکړل او په دې سره وضعیت نور هم تشدید شو.
د تېرې شنبې په ماښام د امریکا ولسمشر ډونالډ ټرمپ اعلان وکړ چې هند او پاکستان د دې هیواد په منځګړیتوب پر سملاسي اوربند هوکړه کړې ده.
د ډونالډ ټرمپ تر اعلان وروسته د هند او پاکستان د بهرنیو چارو وزیرانو هم دا اوربند تایید کړ.
