اطلاعات روز: د افغانستان لپاره د امریکا پخواني استازي زلمي خلیلزاد د پاکستان د دفاع وزیر خواجه محمد اصف څرګندونو ته په غبرګون کې ویلي چې د داعش په ګډون ترهګرې ډلې لا هم په پاکستان کې دي.
ښاغلي خلیلزاد نن ماښام (شنبه، ۶ د غوایي) پر ایکس لیکلي چې د پاکستان دفاع وزیر پخوا له ترهګرو او افراطي ډلو خپل ملاتړ «تېروتنه» بللې؛ نو ایا پاکستان نور ترهګرو او افراطي ډلو ته ځای نه ورکوي؟
د امریکا پخواني ځانګړي استازي ویلي: «له بده مرغه، باوري راپورونه شته چې په پاکستان کې د مهمو او خطرناکو ترهګرو ډلو شتون ښیي. د بېلګي په توګه، داعش ډلې لا هم په دې هیواد کې خپل پټنځایونه ساتلي.»
خلیلزاد همدا راز ویلي چې داسې راپورونه شته چې د روان میلادي کال د مارچ میاشتې پر مهال بلوڅ وسلوالو د بلوچستان د «مستونګ» سیمې په غرونو کې د داعش پر یوه روزنځای برید وکړ.
ده ویلي چې له راپورونو سره سم، په دې برید کې د داعش ۳۰ غړي چې ترکي، هندي، تاجیکستاني او ازبکستاني اتباع وو، ووژل شول او روزنځای یې ختم شو.
خلیلزاد ویلي چې که دا راپورونه سم وي، نشي کېدلای چې د دې افرادو شتون دې د پاکستان له استخباراتي سازمان څخه پټ وي؛ البته که پاکستان په خپله خاوره کې د ترهګرۍ ختمولو ته ژمن وي.
د امریکا پخواني ځانګړي استازي ویلي چې پاکستان باید په خپله خاوره کې د داعش او نورو ترهګرو ډلو شتون ته متوجې شي؛ ځکه چې د هغوی حضور نه یوازې په خپله پاکستان ته بلکې سیمې او نړیوالې ټولنې ته هم جدي خطر ګڼل کېږي.
ده ویلي: «تر اوسه باید موږ ټولو زده کړي وې چې د تکتیکي موخو لپاره له ترهګرۍ سره لوبې ناورین دی او ناوړه معکوسې پایلې لري.»
د پاکستان دفاع وزیر خواجه محمد اصف له سکای نیوز ټلویزون سره په خپلو تازه څرګندونو کې ویلي چې دې هیواد د تېرو درو لسیزو پر مهال د طالبانو او لشکر طیبه په څېر ترهګرو ډلو مالي ملاتړ کړی دی.
د پاکستان دفاع وزیر ویلي چې دې هیوادا دا «کثیف کار» د امریکا او بریتانیا په شمول د لوېدیځ په غوښتنه کړی دی.
ده د ترهګرو ډلو ملاتړ تېروتنه بللې او ویلي یې دې چې له امله یې پاکستان زیانمن شوی دی.
خواجه محمد اصف د پاکستان لومړی چارواکی دی چې له ترهګرو ډلو ملاتړ په ډاګه مني.
تر دې وړاندې د افغانستان د پخواني حکومت چارواکو په ځلونو پاکستان د طالبانو په ملاتړ او هغوی ته د پټنځایونو په ورکولو تورن کړی و، خو پاکستان دا موضوع ردوله.
اوس مهال طالبان ادعا کوي چې داعش د دې ډلې له لوري تر ځپل کېدو وروسته پاکستان ته انتقال شوي او په دې هیواد کې نظامي او روزنیز مرکزونه لري.
