اطلاعات روز: کندهار کې ځايي سرچينې خبر ورکوي، چې د دې ولایت په ښار او ارغنداب ولسوالۍ کې په دوو جلا پيښو کې دوه کسان وژل شوي دي.
یوې سرچینې د نوم نه یادولو په شرط وویل، چې لومړۍ پیښه تېره شپه (سې شنبه، ۲۶ د وري) ماسخوتن ۰۸:۰۰ بجې د کندهار ښار د دولسمې ناحیې اړوند «سیمانو» پله ته څیرمه رامنځته شوې، چې پرمهال یې وسله والو غلو یو ۲۵ کلن ځوان وژلی دی.
سرچینه زیاتوي، چې د بلال احمد په نوم یاد ځوان ۲۵ کاله عمر درلود او وسله والو غلو د هونډا موټر سایکل لپاره په ډزو ویشتلی او وژلی دی.
د سرچينې په وینا، د پیښې وروسته وسله وال غله له سيمې څخه تښتيدلي دي.
دغه راز کندهار کې یو شمیر نورې سرچينې وايي، چې د دې ولایت په ارغنداب ولسوالۍ کې د تېرې دوشنبې په شپه د محمدنبي په نوم يو ۳۵ کلن کس د نامعلومو وسله والو لخوا د خپل کور سره نږدې وژل شوی دی.
سرچينې زیاتوي، چې دغه کس د ارغنداب ولسوالۍ د د لاورخان سيمې اړوند «کلاچه» کې د انارو په يوه باغ کې وژل شوی دی.
تر اوسه د دغې وژنې اصلي لامل نه دی په ډاګه شوی.
په کندهار کې ځايي طالبانو د یادو دواړو پيښو په اړه تراوسه څه نه دي ويلي.
په دې وروستیو کې د هیواد په بېلابېلو ولایتونو کې پټې وژنې زیاتې شوي، چې تر ډیره لامل نامعلوم وي.
