اطلاعات روز: یوې امریکایي رسنۍ د ډونالډ ټرمپ ادارې د چارواکو په حواله راپور ورکړی چې متحده ایالات هیڅ بنسټ د افغانستان د حکومت په توګه په رسمیت نه پیژني او په کابل کې د خپل سفارت د بیا پرانستلو هیڅ پلان نه لري.
واشنګټن ایګزمینر په یوه خپور کړي مطلب کې لیکلي، چې کابل ته د امریکايي پلاوي سفر بریالی و او دوه امریکايي اتباع د طالبانو له بند څخه خوشې شول، خو د ټرمپ اداره چمتو نه ده چې د طالبانو د ډیپلوماټیکو اړیکو د بیا پیلولو غوښتنه ومني.
طالبانو اعلان کړی و، چې دوی د ښه نیت په توګه یو امریکایی تبعه خوشې کړی او متحده ایالاتو سره تعامل ته چمتو دي.
طالبانو غوښتنه کړې وه چې په واشنګټن کې د افغانستان سفارت دې دوی ته وسپارل شي او په کابل کې دې د امریکا سفارت بیا پرانیستل شي.
خو، واشنګټن ایګزمینر د بهرنیو چارو وزارت د ویاند له قوله ویلي: «متحده ایالات هیڅ بنسټ د افغانستان د حکومت په توګه په رسمیت نه پیژني او له همدې امله هیڅ پلان نه لري چې خپل سفارت ته د بیا پرانستلو اجازه ورکړي.»
د امریکا د ملي امنیت شورا ویاند جیمز هویټ هم څرګنده کړې: «موږ په واشنګټن کې د افغانستان د سفارت په اړه هیڅ ژمنه نه ده کړې، او نه په کابل کې د امریکا د سفارت د وضعیت په اړه کوم بحث روان دی.»
پر افغانستان د طالبانو د ولکې ټینګولو وروسته دغه ډله د افغانستان د رسمي حکومت په توګه هیڅ هیواد په رسمیت نه ده پیژندلې، خو د سیمې هېوادونو او له سیمې هاخوا ځینو هېوادونو له طالبانو سره اړیکې ټینګې کړې دي.
دوه اونۍ وړاندې، یو امریکایي پلاوي، د افغانستان لپاره د امریکا د پخواني استازي زلمي خلیلزاد سره یوځای، کابل ته سفر وکړ او د طالبانو له بند څخه د یو امریکایی تبعه په خوشې کولو بریالی شول.
امریکا د طالبانو له بند څخه د خپل وګړي خوشې کول یو مثبت ګام وباله، خو ویې ویل چې یو شمېر وګړي یې لاهم د طالبانو په بند کې دي. د امریکا د بهرنیو چارو وزیر د ټولو امریکایي اتباعو د خوشې کولو لپاره د هڅو پر دوام ټینګار کړی دی.
د جورج ګلزمن له خوشې کېدو وروسته دې هیواد د طالبانو د کورنیو چارو پر سرپرست وزیر سراج الدین حقاني ایښودل شوې ۱۰ میلیوني ډالریزه جایزه ختمه کړې.
