اطلاعات روز: د ملګرو ملتونو د بشري حقونو د شورا اته پنځوسمه غونډه نن (دوشنبه، ۶ د کب) په جینیوا ښار کې پیل شوه.
په جینیوا کې د افغانستان استازي نصیر احمد اندیشه ویلي چې د ملګرو ملتونو د بشري حقونو د شورا په چوکاټ کې د افغانستان لپاره د ځواب ویلو د مستقل میکانیزم رامنځ ته کولو هڅه کوي.
ده هیله ښوولې چې د روان میلادي کال تر پایه به د ملګرو ملتونو د بشري حقونو په شورا کې د افغانستان لپاره د ځواب ویلو یو مستقل میکانیزم رامنځ ته شي.
ټاکل شوې ده چې د ملګرو ملتونو د بشري حقونو د شورا په اته پنځوسمه غونډه کې د افغانستان لپاره د بشري حقونو ځانګړی راپورچي هم خپل نوی راپور وړاندې کړي.
ښاغلي اندیشه ویلي چې د ښاغلي بینټ نوی راپور چې د جمعې په ورځ وړاندې کېږي، د طالبانو د امر بالمعروف او نهی عن المنکر د قانون پر اغېزو پکې تمرکز شوی دی.
ده ویلي چې د افغانستان د استازولۍ او د بشري حقونو د بنسټونو له لوري څو نورې جانبي غونډې هم کېږي.
طالبانو پر افغانستان تر واکمنېدو وروسته په ځلونو د بشري حقونو په ځانګړې توګه د ښځو او نجونو د حقونو په پراخ نقض تورن شوي دي.
د ملګرو ملتونو د بشري حقونو شورا د دې ډلې د بشري حقونو نقض غندلی او غوښتنه یې کړې چې د دې ډلې مشران یې باید په تړاو وپوښتل شي.
