اطلاعات روز: زابل کې د طالبانو ځايي چارواکي خبر ورکوي، چې د دې ولايت په مرکز قلات ښار کې د یوې ترافيکي پيښې له کبله ۷ کسان مړه او درې نور ټپیان شوي دي.
په دې ولايت کې د طالبانو د امنيې قومندانۍ وياند ذبیح الله جوهر وايي، چې ياده پيښه نن (پنجشنبه، ۲ د کب) غرمه مهال د مرکز قلات اړوند پُل سنګي ته څیرمه «کانګریټ» سیمه کې د یو ټیلر او پاسو ډوله موټر د ټکر له امله رامنځته شوې.
نوموړی زیاتوي، چې په پيښه کې د څلورو ښځو په ګډون درې ماشومان مړه شوي او دوې ښځې او یو ماشوم ټپیان دي.
نوموړي وویل، چې سیمې ته طالب امنیتي ځواکونه رسيدلي او د پیښي قربانيان يې روغتيايي مرکز ته انتقال کړي، چې په وینا یې ډاکټرانو د ټپیانو روغتیایي وضعیت د ډاډ وړ ښودلی دی.
طالب چارواکو د دې پیښې لامل نه دی په ډاګه کړی، خو هیواد کې ډیری ترافیکي پیښې د سړکونو د خرابوالي او د موټر چلوونکو د بې اختیاطۍ له کبله رامنځته کېږي.
