اطلاعات روز: د امریکا د دفاع وزیر پېټ هېګسټ ویلي، هغه څه چې په افغانستان کې پیښ شوي ورته بیا کتنه کوي او په وینا یې چې په دې برخه کې به حساب ورکونه موجوده وي.
د رویټرز د راپور له مخې، هېګسټ دا څرګندونې د جمعې ورځ (۱۹ د سلواغې) په پنټاګون کې د امریکا د دفاع وزارت کارکوونکو ته په یوې وینا کې کړې دي.
هغه ویلي: «موږ به هغه څه وګورو چې په افغانستان کې پیښ شوي او چارواکي یې مسوول وګڼو، نه د غچ اخیستلو لپاره، بلکې په دې باید پوه شو، چې تیروتنې څه وې او ولې یې مسوولیت نه دی اخیستل شوی.»
امریکا په ۲۰۲۱ کال کې له افغانستان څخه ووتله.
د امریکا د وتلو پروسه په کابل کې د امریکا په ملاتړ د حکومت د چټک سقوط او د طالبانو د چټک پرمختګ له امله ګډوډه وه.
د تخلیې د پروسې په جریان کې د کابل په هوايي ډګر کې یو مرګونی ځانمرګی برید وشو چې لسګونه افغانان او ۱۳ امریکایي سرتیري پکې ووژل شول.
د امریکا ولسمشر ډونالډ ټرمپ په وار وار د جو بایډن پر ادارې له افغانستان څخه د امریکايي ځواکونو د ایستلو په څرنګوالي نیوکه کړې او ویلي یې دي چې که هغه ولسمشر وای، نو داسې یو څه به نه رامنځته کیدل.
دا په داسې حال ده، چې د ټرمپ لومړۍ دورې حکومت له طالبانو سره د سولې تړون لاسلیک کړ، او د امریکایي ځواکونو وتل د همدې تړون پر بنسټ ترسره شول.
جو بایډن به ویل، چې هغه ته له طالبانو سره تړون له ټرمپ څخه په میراث پاتې شوی او اړ و، چې پلي یې کړي.
