اطلاعات روز: د کندهار ولایت د امنیې قومندانۍ لپاره د طالبانو مسوولين وايي چې د ياد ولايت په سپين بولدک ولسوالۍ کې د يوې پخوانۍ سرګلولې په چاودنه کې دوه ماشومان وژل شوي دي.
په دې ولايت کې د طالبانو د پوليسو وياند اسدالله جمشيد وايي چې ياده پيښه نن سهار (دوشنبه، ۸ د سلواغې) د دې ولسوالۍ په «حوت غره» سيمه کې رامنځته شوې ده.
د نوموړي په وینا، يادو ماشومانو په موندل شوي سرګلولي لوبې کولي او پرې چاودلې ده.
په ورته وخت کې يوې سرچينې اطلاعات روز ورځپاڼې ته ويلي دي چې د وژل شوو ماشومانو عمرونه د ۱۱ او ۱۵ کلونو په شاوخوا کې دي.
دا په داسي حال کې چې تيره ورځ د پکتیا ولایت په ځاځي اریوب ولسوالۍ کي د یوې پخوانۍ راکټ مرمۍ د چادوني په پېښه کي هم یو ماشوم وژل شوی و او د یوې نجلۍ په ګډون پنځه ماشومان نور ژوبل شول.
د افغانستان یو شمېر سیمې لا هم د څو لسیزو جګړو د پاتې شویو ناچاوده توکو له امله ککړې دي. په دې لړ کې طالبانو هم د تېرو ۲۰ کلونو پر مهال ګڼ ماینونه کرلي دي.
ملګري ملتونه وایي چې افغانستان یو له هغو هیوادونو دی چې لا هم ماینونه او ناچاوده توکي د دې هیواد د وګړو او په ځانګړې توګه د ماشومانو ژوند ګواښي.
د دې سازمان په وینا، په افغانستان کې شاوخوا څلور میلیون وګړي له جګړې د پاتې ناچاوده توکو له خطر سره مخ دي.
