اطلاعات روز: د برېتانیا کرکټ بورډ د هغې غوښتنې په ځواب کې چې د افغانستان له کرکټ لوبډلې سره دې لوبه لغوه شي، غبرګون ښودلی او ویلي یې دي چې د کرکټ د نړیوالې شورا یو همغږی او پراخ اقدام به د دې شورا د غړو له خوا تر یو اړخیزو اقداماتو ډېر غوره وي.
ټاکل شوې چې د برېتانیا لوبډله د فبروري پر ۲۶مه په لاهور کې په یوې پنځوس اوریزې لوبې کې له افغانستان سره مخ شي، خو د دې هیواد سیاستوالو غوښتنه کړې چې دا لوبه دې لغوه شي ځکه چې طالبانو د ښځو حقونه نقض کړي دي.
د بي بي سي له راپور سره سم، هغه لیک چې د کارګر ګوند د استازې تونیا انتونیازي له لوري د بریتانیا کرکټ بورډ ته لیکل شوی او د برېتانیا د اصلاحاتو د رهبر نایجل فاراژ، د کارګر ګوند د پخوانیو رهبرانو جرمي کوربین او لرد کیناک له لوري لاسلیک شوی دی، له برېتانیا غوښتل شوي چې لوبه دې لغوه کړي، ترڅو «یو روښانه زیګنال» ولېږدول شي چې «داسې فاحشې ناوړه ګټې اخیستنې د زغم وړ نه دي».
طالبانو واک ته تر رسېدو وروسته د ښځو پر ورزش بندیز لګولی دی. ځینو ښځینه ورزشکارانو د خپل امنیت په خاطر افغانستان پرېیښی دی.
دا په داسې حال کې ده، چې د کرکټ د نړیوال شورا (آی سي سي) د ځینو مقرراتو له مخې په دې شورا کې د بشپړ غړیتوب یو شرط د ښځینه او نارینهوو د لوبډلې درلودل دي.
مګر د افغانستان د نارینهوو لوبډله کولای شي د کرکټ په نړیوالو لوبو کې له کوم بندیز پرته ګډون وکړي.
د ځینو خلکو په اند د افغانستان د کرکټ ځینې لوبغاړي له طالبانو سره نږدې اړیکې لري او دې موضوع انتقادونه راپارولي دي.
د افغانستان ځینې فعالان غواړي چې د افغانستان پر کرکټ لوبډله دې بندیز ولګېږي ځکه چې د دوی په اند دا لوبډله له طالبانو سره اړیکې لري او هغوی د افغانستان د ښځو او نجونو د حقونو ملاتړ نه کوي. که څه هم د افغانستان ځینو لوبغاړو وخت ناوخت پر ټولنیزو رسنیو د نجونو پر زده کړو د طالبانو بندیزونه ناسم بللي او د دې بندیز د لغوه کېدو غوښتنه یې کړې.
د برېتانیا د کرکټ بورډ اجرایوي مدیر ریچارډ ګولډ د ۱۶۰ سیاستوالو له لوري لیکل شوي لیک ته چې د افغانستان پر کرکټ لوبډلې بندیز غواړي، ویلي چې د کرکټ نړیواله شورا «د داسې حل لارې پیدا کولو ته ژمنه ده چې په افغانستان کې د ښځو او نجونو د حقونو ملاتړ وکړي».
ده ویلي: «په داسې حال کې چې د نړیوالې جنایي محکمې په چوکاټ کې دننه د نړیوالو اقداماتو په تړاو کوم توافق نشته، د برېتانیا کرکټ بورډ به په فعاله توګه د داسې اقداماتو ملاتړ کوي.»
ګولډ ویلي، چې د کرکټ د نړیوالې شورا د یوه غړي د یو اړخیزو اقداماتو په پرتله به د دې شورا همغږې او پراخه تګلاره ډېره اغېزناکه وي.
ده په عین مهال کې ویلي، چې د برېتانیا کرکټ بورډ به د افغانستان پر خلاف د دوه اړخیزو لوبو کولو ته دوام ورکړي، خو په هیڅ ډول هم بندیز ته ژمن نه دي.
د کرکټ دوه اړخیزې لوبې د هیوادونو د کرکټ بورډونو له خوا پلان کېږي، مګر د اتلانو د جام په څېر نړیوال ټورنمنټونه د کرکټ د نړیوالې شورا له خوا اداره او پلان کېږي.
د بي بي سي په وینا، دا چې د افغانستان لوبډله د کرکټ د نړیوالې شورا له مخې کولای شي په نړیوالو لوبو کې ګډون وکړي، نو برېتانیا به هم د دې لوبډلې پر وړاندې ولوبېږي.
په دې وروستیو کې د اسټرالیا کرکټ لوبډلې هم پر ښځو د طالبانو د بندیزونو له امله له افغانستان سره له څو لوبو کولو ډډه وکړه البته د ۲۰۲۳ کال په نړیوال پنځوس اوریز جام او د ۲۰۲۴ کال په ټي ټونټي نړیوال جام کې دواړې لوبډلې د یو-بل پر وړاندې ولوبیدې.
ګولډ زیاته کړې چې د برېتانیا کرکټ بورډ به د دې هیواد له دولت، نړیوالو پلاوو او د کرکټ له نړیوالې شورا سره تعامل وکړي «ترڅو د معنادار بدلون لپاره ټولې ممکنه حللارې وارزول شي» خو ویلي یې دي چې د دې موضوع په اړه «بېلابېل لیدلوري» شته دي.
ګولډ ویلي: «موږ د هغو کسانو له لوري مطرح شوې دا اندیښنې درک کوو چې فکر کوي د سړیو د کرکټ پر لوبې بندیز به په ناغوښتل شوې توګه د طالبانو د هغو هڅو ملاتړ وي چې غواړي ازادۍ وځپي او د افغانستان ټولنه نوره هم منزوي کړي.»
د بي بي سي د راپور له مخې، د برېتانیا د کلتور، رسنیو او ورزش ادارې ویلي، چې د افغانستان د ښځو د کرکټ لوبډلې د موضوع په تړاو له خپل کرکټ بورډ سره په اړیکه کې دي.
د دې ادارې ویاند ویلي: «موږ په افغانستان کې د ښځو او نجونو د حقونو د وحشتناک تضعیف په تړاو سخت اندېښمن یو.»
