اطلاعات روز: د ننګرهار ولایت په یو شمیر ولسوالیو کې نن (دوشنبه، ۲۱ د لړم) سختو ورښتونو او ږلۍ ځاني او سخت مالي زیانونه اړولي دي.
په دغه ولایت کې ځایي سرچینې خبر ورکوي، چې په کوز کونړ ولسوالۍ کې د سخت ورښت، توپان او ږلۍ له کبله یو کس خپل ژوند له لاسه ورکړی دی.
د سیمې یو اوسیدونکي عبدالجلیل وایي، چې نن له غرمې مخکې د ښېوې ولسوالۍ اړوند «شګې» قریې په مربوطاتو کې د سخت باران او توپان له کبله د محمد ولي په نامه پر یو شپېته کلن کس د کور دیوال راپرېوتی چې پرمهال یې نوموړي خپل ژوند له لاسه ورکړی دی.
په سیمه کې یوې بلې سرچنې بیا وویل، چې د نن ورځې ورښتونو له کبله په مختلفو سیمو کې د استوګنې کورونه رانړیدلي، فصلونه او لارې تخریب شوي دي.
ورته مهال ننګرهار کې پېښو پر وړاندې چمتووالي ادارې طالب مسوولینو ویلي، چې په کوز کونړ، کامې، ګوشتې او بټي کوټ ولسواليو کې سلګونه جريبه ځمکه کې ولاړ فصلونه لمنځه تللي او خلکو ته مالي زيانونه اوښتي دي.
دوی زیاته کړې، د زیانمنو شویو کورنیو په اړه یې ځپل شویو سیمو ته د سروې ټيمونه استولي چې له سروې وروسته به زيانمنو شويو کورنيو سره لازمې مرستې تر سره شي.
دا په داسې حال کې ده چې د هوا پېژندنې ادارې د هیواد په زیات شمیر ولایتونو کې د سختو ورښتونو او سیلابونو د راوتلو خبرداری ورکړی دی.
