اطلاعات روز: په هرات او زابل کې سرچینې وایي، چې په دې ولایتونو کې په دوو جلا پیښو کې یوه ځوانه نجلۍ او یو ځوان هلک د خپل ورونو له لوري وژل شوي دي.
په هرات کې یوې سرچينې وویل، چې د دغه ولایت د ښار د څلورمې ناحیې اړوند «لومړي نمبر» سیمه کې یوه ۲۴ کلنه نجلۍ دوه شپې وړاندې (۲۴ د تلې) وژل شوې ده.
یوې سرچینې اطلاعات روز ورځپاڼې سره په خبرو کې د دغه نجلۍ د وژنې لامل جبري نکاح یاده کړې.
د سرچينې په وينا، دغې ځوانې نجلۍ له يوه سړي سره د نکاح کولو لپاره د خپل ورور غوښتنه رد کړې وه.
سرچينې زياته کړه، چې په قتل تورن کس هم نيول شوى دى.
هرات کې د طالبانو ځایي مسوولینو تر اوسه په اړه څه نه دي ويلي.
بلخوا د زابل په میزانې ولسوالۍ کې یو کس خپل ورور د ځمکې او میراث د ویش پرمهال په ډزو وژلی دی.
کندهار کې سرچینو وویل، چې وژل شوی کس جان محمد نومېده او د کندهار ولایت د میانشین ولسوالۍ اړوند «پرلېز دیاګوري» سیمې اصلي اوسېدونکی و.
د سرچینو په وینا، جان محمد د خپل د ورور لخوا په «چره یي» توپک ویشتل شوی دی.
زابل کې د طالبانو امنیتي مسوولین هم دا پېښه تاییدوي او وایي، چې جان محمد او ورونه یې له څه مودې راهیسې د زابل په میزانې ولسوالۍ کې ژوند کاوه.
د پولیسو په خبره، د جان محمد او ورونو ترمنځ یې شخړه د ځمکې د وېش پر سر رامنځته شوې وه.
پولیس وایي، چې د جان محمد ورور د دې پېښې وروسته له سیمې تښتېدلی او دوی یې د نیولو هڅې روانې کړي دي.
