اطلاعات روز: د افغانستان لپاره د روسیې ځانګړی استازی وایي چې دوی به ډېر ژر په دې هیواد کې طالبان د ترهګرو ډلو له نوملړه وباسي.
د سپوټنیک خبري اژانس له راپور سره سم، کابلوف نن (جمعه، ۱۳ د تلې) د «مسکو فرمټ» تر شپږمې غونډې وروسته خبریالانو ته ویلي چې په روسیه کې د ترهګرو ډلو له نوملړه د طالبانو د حذفولو لپاره په لوړه کچه تصمیم نیول شوی دی، خو دا بهیر باید تر قانوني مراحلو تېر شي.
تر دې وړاندې هم د روسیې ځانګړي استازي ويلي و چې په روسیه کې د ترهګرو ډلو له نوملړه د طالبانو د حذفولو وړاندیز د دې هیواد د ولسمشر ولادیمیر پوتین تر میز پورې رسېدلی دی.
ده زیاته کړې وه چې د روسیې د بهرنیو چارو وزارت له دې پرېکړې سره هوکړه کړې.
د دې اعلان په صورت کې روسیه د سیمې په کچه درېیم هیواد کېږي چې طالبان د ترهګرو ډلو له نوملړه حذفوي.
تر دې وړاندې قزاقستان او قرقیزستان هم طالبان د ترهګرو ډلو له نوملړه حذف کړي و.
