اطلاعات روز: د امریکا متحده ایالاتو په ولسمشریزو ټاکنو کې د دیموکرات ګوند د نوماندې کامالا هریس د کمپاین دفتر ویلي، چې له طالبانو سره د ډونالډ ټرمپ توافق د دې لامل شو چې د افغانستان دولت وشړېږي او امریکايي نظامیان له دې هیواده په بې نظمه ډول ووځي.
د سي اين اين له راپور سره سم، د هریس د کمپاین د ملي امنیت ویاند مورګان فینکلشتاین د شنبې په ورځ له افغانستان سره د ټرمپ چلند د هغه د بهرني سياست یوه بېلګه وبلله او ویې ويل چې امریکايي سرتېري يې په خطر کې واچول.
تر دې وړاندې ټرمپ له افغانستانه د امریکايي نظامیانو د وتلو د څرنګوالي په تړاو پر بایډن او هریس نيوکې کولې.
مورګان فینکلشتاین: «ټرمپ په بې شرمۍ د ولسمشر پر مرستیالې برید کوي ځکه هیلهمن دی چې هیواد به تېرباسي او هېره کړي چې ستراتېژۍ یې د متحده ایالاتو اقدامات تضعیف کړي او سرتېري او زموږ متحدین یې له خطر سره مخ کړي دي. تاسې فکر وکړئ چې ټرمپ غوښتل تر ۱۱ سپټمبر څو ورځې وړاندې طالبان کېمپ ډيويډ ته راولي.»
ده زیاته کړې چې ټرمپ له هماغو افرادو سره چې افغانستان یې په تاوتریخجنه طریقه ونیوه، یوه بده معامله وکړه او له امله یې د افغانستان دولت وپاشل شو.
فینکلشتاین په دې اعلامیه کې ويلي: «د ټرمپ بې نظمه اقدامات په افغانستان کې ناوړه پایلې درلودې.»
ټرمپ د خپلې ولسمشرۍ پر مهال له افغانستانه د امریکايي نظامیانو د وتلو ژمنه کړې وه. د ده دولت د ۲۰۲۰ کال پر مهال له طالبانو سره مذاکرات پېل کړل او توافق یې ورسره لاسلیک کړ.
د ۲۰۲۰ کال د ولسمشرۍ په ټاکنو کې د ټرمپ تر ماتې وروسته بایډن د څو میاشتو په ځنډ سره له افغانستانه د امریکايي ځواکونو د وتلو برنامه تعقیب کړه.
د امریکايي ځواکونو تر وتلو وروسته د افغانستان دولت وپاشل شو او د تخلیې پر مهال د کابل په هوایي ډګر کې پر امریکايي ځواکونو برید کې ۱۳ تنه ووژل شول.
ټرمپ دا وتل شرم بللی او بیا – بیا یې په دې تړاو پر بایډن نیوکه کړې.
