اطلاعات روز: د روسیې د ولسمشرۍ ماڼۍ ویاند دیمیتري پیسکوف د قزاقستان له خوا د ترهګرو ډلو له نوملړه د طالبانو د نوم ایستلو پرېکړه یوه اړتیا ګڼلې او ویلي یې دي چې دا پریکړه درک کوي.
د ټاس خبري اژانس د راپور له مخې، پیسکوف خبریالانو ته ویلي، چې قزاقستان له افغانستان سره ډېر نږدې دی او «له اصلي چارواکو سره د اړیکو ساتل د ګاونډیانو لپاره مهم دي.»
د کرملین ویاند څرګنده کړې: «دا یوه اړتیا ده، ځکه چې له دې پرته د اړیکو جوړول ناشوني دي. موږ وضعیت درک کوو.»
د قزاقستان د بهرنیو چارو وزارت تایید کړې، چې د باصلاحیته دولتي چارواکو له هر اړخیزې کتنې او ارزونې وروسته د قزاقستان په خاوره کې د ممنوع ترهګرو سازمانونو له لیست څخه د «طالبانو غورځنګ» د ایستلو پریکړه شوې ده.
د دغه وزارت په اعلامیه کې راغلي چې د دې پرېکړې موخه د سیمه ییز ثبات ټینګښت او د روانو خبرو ملاتړ دی.
د قزاقستان د بهرنیو چارو وزارت ویلي، چې په افغانستان او ټوله سیمه کې د یوه باثباته او سوله ییز چاپېریال د تامین په موخه د نړیوالې ټولنې له هڅو ملاتړ ته ژمن دی.
د طالبانو د بهرنیو چارو وزارت تر دې مخکې په قزاقستان کې د ممنوع ترهګرو سازمانونو له لیست څخه د دغې ډلې د نوم ایستلو اعلان کړی و او ویلي یې و چې دوی دغه پرېکړه د ستایلو وړ ګام ګڼي او هرکلی یې کوي.
دغه وزارت زیاته کړې، چې د قزاقستان پرېکړه د طالبانو په اړه د سیمې او نړۍ د سیاسي تفاهم ښکارندويي کوي او د دې ډلې او نورو هېوادونو ترمنځ د اړیکو د ټینګولو پر وړاندې د خنډونو د لېرې کولو په معنا ده.
تر دې مخکې قزاقستان هم اعلان کړی و چې د طالبانو نوم یې د ترهګرو ډلو له لېست څخه لېرې کړی دی.
دغه راز روسي دیپلوماټانو په وار وار ویلي، چې مسکو کولای شي طالبان د تروریستي سازمانونو له لیست څخه وباسي.
د افغانستان لپاره د روسیې د ولسمشر ځانګړي استازي ضمیر کابلوف په وینا، د بهرنیو چارو وزارت او د عدلیې وزارت له دې مخکې د روسیې ولسمشر ولادیمیر پوتین ته راپور ورکړی و چې ښایي طالبان د ترهګرو ډلو له لیست څخه وایستل شي.
په ورته وخت کې د روسیې د بهرنیو چارو وزیر سرګي لاوروف ویلي، چې د ترهګرو له نوملړه د طالبانو د ایستلو نوښت د حقیقت څرګندونه کوي.
په افغانستان کې د طالبانو د حاکمیت څه باندې درې کاله تېریږي، خو تر اوسه هېڅ هېواد د دغې ډلې حکومت په رسمیت نه دی پېژندلی.
