اطلاعات روز: د طالبانو مشرانو پر افغانستان د خپلې واکمنۍ د درېيمې کليزې د لمانځلو په مراسمو کې له نړۍ سره د تعامل او «نېکو اړیکو» غوښتنه وکړه.
دا مراسم نن (چهارشنبه، ۲۴ د زمري) د پروان ولایت په باګرام نظامي اډه کې جوړ شوي و چې د طالبانو سياسي او نظامي مشرانو پکې ګډون کړی وو.
د افغانستان د رسنیو مرکز چې اوس د طالبانو تر واک لاندې دی، راپور ورکړی چې د دې ډلې د لومړي وزير سياسي مرستيال مولوي عبدالکبیر په خپلو خبرو کې وويل: «د نړۍ له ټولو هیوادونو سره نیکې او حسنه اړیکې غواړو.»
ده زیاته کړې چې طالبانو په خپل بهرني سياست کې «پام وړ لاسته راوړنې» لرلې دي او «په هیواد کې په لسګونو سفارتونه خلاص شوي، بهرني ډيپلوماټان افغانستان ته سفر کوي او په ډيپلوماټیکو غونډو کې د افغانستان (طالبانو) استازي فعال ګډون لري».
د طالبانو د کورنیو چارو سرپرست وزیر سراج الدین حقاني هم پر افغانستان د دې ډلې د درېيمې کليزې په مراسمو کې په باګرام کې له نړۍ سره د تعامل غوښتنه وکړه.
حقاني په دې مراسمو کې وويل: «له نړیوالې ټولنې غواړو چې له تر لاسه شوي فرصت څخه استفاده وکړي او له افغانستان (طالبانو) سره د همکارۍ او تعامل لاره خپله کړي.»
په موټرسایکل او زړې بوشکې سره نظامي پریډ
طالب ځواکونو نن پر افغانستان د دې ډلې د واکمنۍ د درېيمې کلیزې په مناسبت په باګرام نظامي اډه کې نظامي پریډ وکړ.
د دې مراسمو په يوه برخه کې د طالبانو نظامیان پر موټرسایکلو د خپلو مشرانو مخ ته تېر شول چې زړې بوشکې هم ورسره وې.
طالبانو د جمهوریت پر خلاف د شل کلنې جګړې پر مهال له موټرسایکلونو په خپلو بریدونو کې استفاده کوله.
همدا راز دې ډلې به په زړو بوشکو کې لاسي مقناطیسي ماینونه ځای پر ځای کول او د سړک پر غاړه، ښارونو او کلیو کې به يې چاودنې ورکولې.
طالبان پر افغانستان د خپلې واکمنۍ درېيمه کلیزه په داسې حال کې لمانځي چې تر اوسه هیڅ هیواد د دوی حکومت په رسمیت نه دی پېژندلی او د دوی ډېری مشران لا هم د ملګرو ملتونو د بندیزونو په نوملړ کې دي.
