اطلاعات روز: زابل کې د طالبانو مسوولین خبر ورکوي، چې د دې ولایت په مرکز قلات او شینکۍ ولسوالۍ کې د سختو ورښتونو او راوتلو سیلابونو له امله ۱۰ تنه مړه شوي او یو کس ټپي دی.
په دې ولایت کې د طالبانو امنیې قومندانۍ ویاند ذبیح الله جوهر وایي، چې تېره شپه (یکشنبه، ۱۴ د زمري) د مرکز قلات ښار او شینکۍ ولسوالۍ په بېلابېلو سیمو کې د سختو ورښتونو له امله سیلابونه راوتلي، چې د ځاني زیان ترڅنګ یې خلکو ته مالي زیانونه هم اړولي دي.
نوموړی زیاتوي، چې د سېلابي اوبو له جاري کېدو سره ځینې کسان ورک شوي، چې دوی یې د موندلو لپاره پلټنې پېل کړي دي.
جوهر وویل: «د زابل ولایت مرکز قلات د شینکۍ ولسوالۍ د ډب، عینې پیتاو، وسطې، چونۍ او ځینو نورو ساحو کې خلکو ته په زیاته کچه مالي او ځاني زیانونه اوښتي چې د جملې څخه یولس تنو ته مرګز ژوبله اوښتې چې لس کسان مړه شوي چې په هغو کې د ۷ تنو جسدونه پیدا شوي او ۳ تنه لاهم ورک دي، یو بل تن ژوبل شوی.»
د ده په وینا، چې سیمې ته یې پر وخت د ژغورنې ټیمونه لېږلي او لاهم عملیات دوام لري.
هغه زیاته کړه، چې مرکز قلات او د شینکۍ ولسوالۍ ټولو سیمو ته غځیدلې لارې چې د سېلابي اوبو له امله تړل شوې وې بېرته خلاصې کړې دي.
دا په داسې حال کې ده، چې د طالبانو د ترانسپورټ او هوايي چلند وزارت د هوا پېژندنې ادارې نن او سبا د زابل په ګډون د هېواد په یو شمیر ولایتونو کې د سختو بارانونو او سېلابونو د راوتو خبرداری ورکړی دی.
