اطلاعات روز: د طالبانو د کډوالو او راستنېدونکو چارو وزارت وايي چې د وروستیو درو ورځو پر مهال له ايران او پاکستان څخه افغانستان ته ۱۱ زره او ۹۹۷ کډوال راستانه شوي دي.
دې وزارت نن (شنبه، ۱۶ د چنګاښ) د يوې اعلاميې په خپرولو سره ويلي چې دا افراد د چنګاښ له ۱۲ څخه تر ۱۵مې نيټې پورې د اسلام کلا، پل ابريشم، سپين بولدک او تورخم له لارو هيواد ته راغلي دي.
د دې وزارت د اعلاميې له مخې، په دې موده کې اووه زره او ۱۲۵ تنه د اسلام کلا او درې زره او ۵۲۰ تنه د نيمروز ولایت د پل ابریشم له لارې له ایران څخه افغانستان ته راغلي دي.
د دې وزارت په اعلامیه کې ويل شوي چې په دې موده کې ۷۸۱ تنه د تورخم او ۵۷۱ تنه نور د سپين بولدک له لارې له پاکستانه افغانستان ته راغلي دي.
د طالبانو د کډوالو چارو وزارت زياته کړې چې دا افراد تر ثبت وروسته د کډوالو په چارو کې د ملګرو ملتونو د عالي کميسارۍ دفترونو، د کډوالۍ نړیوال سازمان او د خوړو نړیوال سازمان ته د مرستو د تر لاسه کولو لپاره ور پېژندل شوي دي.
د روان کال پر مهال له ايران او پاکستان څخه د افغان کډوالو شړل او راستنېدل په پرلپسې توګه دوام لري.
تر اوسه د هغو کډوالو دقيق شمېر نه دی خپور شوی چې د روان کال پر مهال له دې دوو هيوادونو افغانستان ته ستانه شوي دي.
تېر کال له پاکستان څخه تر ۵۰۰ زره او له ایران څخه تر ۵۲۰ زره زيات کډوال افغانستان ته ستانه شول.
