اطلاعات روز: د سولې او سیاست په چارو کې د ملګرو ملتونو د عمومي منشي مرستیالې رزماري ډیکارلو د دوحې د ناستې په درشل کې د دې غونډې په اړه له یو شمېر ښځو او مدني فعالانو سره پر ليکه خبرې کړې دي.
د افغانستان د کانونو او پټرولیم پخوانۍ وزیرې نرګس نهان پر ایکس په خپله پاڼه لیکلي، چې تېره شپه (چهارشنبه، ۶ د چنګاښ) يې په دې غونډه کې ګډون کړی دی.
د اغلې نهان له لوري له خپرو کړیو انځورونو سره سم ماري اکرمي، نگینه یاري، سید اکرام افضلي، احسان قانع، عبدالله احمدی او ولیالله رحماني د دې مجازي خبرو نور ګډونوال وو.
نرګس نهان ليکلي، چې دې له دوحې غونډې د ښځو او مدني ټولنې پر حذف او د دې غونډې له اجنډا څخه د بشري حقونو او ښځو د حقونو د بحثونو پر لېرې کېدو نيوکې کړي او ويلي يې دي چې طالبانو ته د ملګرو ملتونو له «تمکینیدو مايوسه» شوي دي.
د افغانستان د کانونو او پټرولیم پخوانۍ وزیرې ليکلي: «موږ د افغانستان ښځې او نجونې ډيرې هېله مندې وو چې د دوحې پروسه به د ښځو، مدني ټولنې، طالبانو او نورو ټولو سياسي ډلو په ګډون د نظام د مشروعیت، بشري حقونو او بشرپالي وضعیت کړکېچونو ته د رسيدګۍ لپاره يو ټولشموله بهير پېل کړي.»
دې زياته کړې چې که ملګري ملتونه مجازي فضا او د افغانستان رسنۍ تعقیب کړي متوجې به شي چې اوس مهال د دوحې پروسه د مشروعیت له ننګونې سره مخ ده ځکه چې ډيرو ښځو د دې پروسې د تحريم وړاندیز کړی دی.
ټاکل شوې چې د افغانستان په چارو کې د هيوادونو د ځانګړو استازو درېيمه غونډه د راتلونکې اونۍ د یکشنبې او دوشنبې په ورځو په دوحه کې جوړه شي.
دا غونډه چې د طالب استازو په ګډون سره جوړيږي د ګډونوالو له نوملړه يې د ښځو حذفولو او د دې غونډې له اجنډا څخه د بشري حقونو او ښځو د حقونو موضوعاتو ایستلو پراخې نيوکې را پارولې دي.
