اطلاعات روز: د افغانستان لپاره د روسيې ځانګړي استازي ضمير کابلوف ويلي چې د دې هيواد ولسمشر ولاديمير پوتين ته د ترهګرو ډلو له نوملړه د طالبانو د حذفولو په تړاو وړانديز شوی دی.
روسي ټاس خبري اژانس نن (دوشنبه، ۷ د غبرګولي) د ښاغلي کابلوف له خولې ويلي چې دا وړانديز د روسيې د بهرنيو چارو او عدليې وزارتونو له لوري پوتين ته شوی دی.
د روسيې ځانګړي استازي ويلي چې د دې موضوع په اړه د دې هيواد د بهرنيو چارو د وزارت نظر «مثبت» دی.
ده زياته کړې چې په روسيه کې د ترهګرو ډلو له نوملړه د طالبانو له حذفولو پرته د دې ډلې د رسميت په اړه خبرې وختي دي.
ښاغلي کابلوف ويلي چې دوی د روسيې له رهبرۍ سره ټولې انديښنې شريکې کړې دي او زياته کړې يې ده چې «موږ پرېکړي ته منتظر يو.»
پر افغانستان د طالبانو تر واکمنېدو وروسته روسيه له هغوی سره پراخ تعامل لري، خو لا يې هم دا ډله د ترهګرو ډلو له نوملړه نه ده ايستلې.
د روسيې د بهرنيو چارو وزارت د روان لمريز کال په حمل مياشت کې اعلان وکړ چې د ترهګرو ډلو له نوملړ څخه د طالبانو پر ايستلو غور کوي.
اوس مهال قزاقستان يوازينی هیواد دی چې طالبان يې د ترهګرو ډلو له نوملړه حذف کړي دي.
