اطلاعات روز: لغمان کې ځایي سرچینې خبر ورکوي، چې د دغه ولايت په الیشنګ ولسوالۍ کې د دوو قومونو ترمنځ د وسله والې نښتې له امله درې تنه وژل شوي او درې تنه نور ټپیان دي.
د سیمې اوسیدونکی ضیاالرحمن وایي، چې نښته تېره ورځ (چهارشنبه،٢دغبرګولي) سهار مهال د دې ولایت د الیشنګ ولسوالۍ اړوند «مسمت» کلي کې رامنځته شوې.
د نوموړي په خبره دغو دوو قومونو پر یو بل د وسلو ډزې کړي چې پر مهال یې د يوه ماشوم په ګډون درې تنه وژل شوي او د یوې ښځې په ګډون درې نور ټپيان شوي دي.
ضیالرحمن وویل: «د الیشنګ ولسوالۍ په مسمت سیمه کې دوه قومونو سې شنبه یو بل ته ګواښ کړی وو، خو پرون چهارشنبه سهار یې پر یو بل دزې کړي، چې پر مهال یې درې کسان وژل شوي او درې نور ټپیان شوي په وژل شویو کې یو ماشوم او ټپیانو کې یوه ښځه شامله ده، دغه قومونو له پخوا د ځمکو پر سر دعوې درلودې نو کیدای شي د جګړې لامل همدا وي.»
بلخوا لغمان کې طالب چارواکي هم په دغه ولایت کې د دوو قومونو ترمنځ جګړه تاییدوي او وايي، چې دغو قومونو پخوا هم خپلمنځي اختلافات درلودل ځکه يې پر يو بل ډزې کړي.
د لغمان د امنيې قوماندانۍ لپاره د طالبانو وياند يونس يوسفزى وايي، چې طالب سرتیري په وخت د پېښې ځای ته رسیدلي، چې د پېښې په تړاو یې له دواړو خواوو ۲۵ تنه له ۳۰ ميله وسلو سره نيولي دي.
له دې دوه کاله وړاندې د لغمان د الیشنګ ولسوالۍ اړوند په «میل درې» سیمه کې هم د دوو قومونو ترمنځ د ځمکې پر سر وسله واله نښته شوې وه، چې پر مهال یې دوه تنه وژل شوی وو او څلور نور ټپیان وو.
د لغمان په لېرې پرتو سیمو کې ډیر کله د قومونو ترمنځ دا ډول نښتې رامنځته کېږي، چې لامل یې د ځمکو پر سر لانجې او شخصي دښمنۍ دي.
