اطلاعات روز: د ملګرو ملتونو ښځینه برخې «په معلوماتي او ارتباطي ټکنالوژۍ کې د نجونو» د نړيوالې ورځې په مناسبت ويلي، چې افغانستان د نجونو د هيلو په هديره بدل شوی دی.
په اطلاعاتي او ارتباطي ټکنالوژۍ کې د ښځو نړيواله ورځ یوه کلنۍ غونډه ده چې هر کال د اپريل مياشتې په وروستۍ پنجشنبه جوړېږي، تر څو ښځې او ځوانې نجونې د معلوماتي او ارتباطي ټکنالوژۍ (آی سي ټي) په برخه کې تشويق او وهڅوي.
د ملګرو ملتونو ښځينه برخې نن (پنج شنبه، ۶ د غويي) پر ايکس په خپله پاڼه ليکلي، په داسې حال کې چې نړۍ په معلوماتي او ارتباطي ټکنالوژۍ کې د ښځو د زيات ګډون لپاره هڅې کوي، خو افغانستان د هغو ميليونونو نجونو د هيلو په هديره بدل شوی چې له ښوونځي پاتې دي.
خو دې دفتر زياته کړې چې د افغانستان ښځې او نجونې نه تسليمېږي.
د ملګرو ملتونو ښځينه برخې ويلي، چې د زده کړې لپاره د افغان نجونو په مبارزه کې د هغوی تر څنګ ولاړ دي.
د افغانستان ښځې او نجونې د طالبانو تر واکمنېدو وروسته له سختو محدوديتونو سره مخ دي. اوس مهال تر شپږم ټولګي پورته نجونې له زده کړې بې برخې دي او همدا راز ښځې د کار کولو اجازه هم نه لري.
د تېرو دریو کلونو پر مهال د تحصيل او کار د حق په ګډون د ښځو او نجونو پر بنسټيزو حقونو د نړۍ د هيوادونو او نړيوالې ټولنې له ټينګار سره-سره طالبان له خپله دريځه نه دې پر شا شوي.
