اطلاعات روز: د پاکستان دفاع وزير خواجه محمد اصف يو ځل بيا افغانستان په خپل هيواد کې د تروريزم سرچينه بللې او خبرداری يې ورکړی دی چې دا لړۍ به تر هغو روانه وي، تر څو کابل د تحريک طالبان پاکستان (ټي ټي پي) روزنيز کمپونه او پټنځايونه ختم نه کړي.
د ايکسپريس ټريبيون له راپور سره سم، اصف د دوشنبې په ورځ (۱۳ د وري) د پاکستان د استازو په مجلس کې له خبريالانو سره په خبرو کې ويلي چې ده په خپله پخوا د يوه پلاوي په ملتيا افغانستان ته سفر کړی او د طالبانو له مشرانو يې غوښتي چې په خپل ګاونډ کې د تروريزم مخنيوی وکړي.
ده زياته کړې چې د افغانستان له لوري وړانديز شوې حل لاره د منلو وړ نه وه مګر بل پلو طالبان په پر له پسې توګه د پاکستاني طالبانو او د پاکستان د دولت تر منځ پر خبرو-اترو ټينګار کوي او د دواړو تر منځ منځګړيتوب کوي.
د پاکستان دفاع وزير ټينګار کړی دی چې د پاکستان او افغانستان پوله بايد د نړۍ د نورو بين المللي پولو په څېر وي او افغان وګړي بايد په ويزې سره پاکستان ته راشي. ده زياته کړې چې دا وضعيت د افغانستان له لوري نه مراعت کېږي.
اصف يادونه کړې چې پاکستان له افغانستان څخه هند ته د توکو انتقال ته اجازه ورکړې ده.
ده ويلي: «موږ جنګېدلي يو او د افغانستان لپاره مو قرباني ورکړې ده خو د افغانستان د دولت د تګلارې تر بدليدو وروسته د هغوی لپاره زموږ انتخابونه محدود دي.»
تر دې وړاندې هم پاکستاني چارواکو بيا – بيا ادعا کړې ده چې پاکستاني طالبان د افغانستان له خاورې په دې هيواد کې خپل عمليات پلانوي، دا هغه ادعا ده چې طالبان يې ردوي او د پاکستاني چارواکو څرګندونې له مسووليته تېښته ګڼي.
له تروريزم سره د پاکستان د مبارزې ادارې ويلي چې په خيبرپښتونخوا ايالت کې پر چينايي وګړو بريد له افغانستان څخه پلان شوی و.
د دې ادارې په وينا، په خيبرپښتونخوا کې پر چينايي وګړو د بريد کوونکی او په دې بريد کې استفاده شوی موټر بم له افغانستان څخه راوستل شوي و.
