اطلاعات روز: د ننګرهار ځایي مسوولين وايي چې د دې ولايت په اچین ولسوالۍ کې یوه شل کلنه نجلۍ د اوبو څاه ته لوېدلې او مړه شوې ده.
د دې ولایت امنیې قومندانۍ لپاره د طالبانو ویاند عبدالبصیر زابلی وایې چې دا پېښه تېره شپه (پنجشنبه،٢، د وري) د اچین ولسوالۍ اړوند «پېښې خوړ» سیمه کې شوې ده.
د زابلي په وينا، د مړې شوې نجلۍ جسد یې نن ماشپين د ځایي خلکو په همکارۍ د اوبو له کوهي راایستلی دی.
زابلي زياته کړې: «د ننګرهار اچین ولسوالۍ اړوند پېښې خوړ سیمه کې يوه مېرمن چې عصبي توازن یې برابر نه و، کوهي ته لویدلې ده او مړه شوې د یادې مېرمنې د پلار زاهد په وینا چې لور يې د اتلس کالو را په دېخوا د عصابو ناروغي لرله چې تیره شپه ناوخته له کوره وتلې وه او نن یې جسد کلي ته څیرمه د اوبو په څاه وموندل شو او د خلکو په همکارۍ را وویستل شو.»
که څه هم د هیواد په جنوبي ولایتونو کې ورته پېښو د ګڼو ماشومانو او میرمنو ژوند اخیستی خو په ننګرهار کې دا لومړۍ پېښه ده.
دا په داسې حال کې چې د طالبانو د حکومت مسوولینو بيا – بيا له خلکو غوښتي و چې د ورته پېښو د مخنیوي لپاره د خپلو څاګانو سرونه پټ کړي.
