اطلاعات روز: د بښنې نړيوال سازمان له زده کړو څخه د افغان نجونو د محروميت دوام خواشينوونکی ګڼلی او ويلي يې دې چې نړۍ نشي کولای له دې وضعيت څخه سترګې پټې کړي.
دې سازمان نن (جمعه، ۳ د وري) پر ايکس ليکلي چې په افغانستان کې د ښوونځيو له پرانيستل کېدو سره-سره لا هم د نجونو ټولګي تش دي.
د بښنې نړيوال سازمان ويلي چې د طالبانو له لوري د نجونو پر زده کړو بنديز د هغوی راتلونکی نابودوي.
طالبانو دوې ورځې وړاندې په افغانستان کې تعليمي کال په پر له پسې توګه درېيم کال د نجونو له حضور پرته پيل کړ.
دې ډلې د خپلې واکمنۍ په لومړيو ورځو کې تر شپږم ټولګي لوړې نجونې تر «بيا اطلاع» پورې ښوونځي ته له تلو منعه کړې.
طالبانو تر دې وروسته ښوونځي او زده کړييز خصوصي مرکزونه هم د نجونو پر مخ وتړل.
د دې ډلې له لوري د نجونو پر زده کړو او تحصيل بنديز په نړيواله کچه غندل شوی او ډېری هيوادونه يې لغو کېدل له دې ډلې سره د اړيکو د عادي کېدلو په لړ کې د لومړني شرط په توګه وړاندې کوي.
د افغانستان وګړو هم د درو وروستيو کلونو پر مهال بيا – بيا د نجونو په وړاندې د ښوونځيو او پوهنتونو د پرانيستنې غوښتنه کړې ده.
خو طالبانو تر اوسه په دې اړه د افغانستان د وګړو او نړيوالې ټولنې غوښتنو ته پاملرنه نه ده کړې او د نجونو پر زده کړو او تحصيل بنديز لا هم پر خپل ځای دی.
