اطلاعات روز: د طالبانو تر مديريت لاندې د افغانستان د احصايې او معلوماتو ملي ادارې ويلي، چې د روان لمريز کال پر مهال د هيواد نفوس ۳۴.۹ ميليونه تنه اټکل شوی دی.
د دې ادارې وياند محمد حليم رافع د طالبانو تر مديريت لاندې له ملي ټلويزیون سره په خبرو کې ويلي، چې د افغانستان د نفوس ۵۱ سلنه نارينه او ۴۹ سلنه يې ښځې دي.
د طالبانو د احصایې او معلوماتو ادارې وياند زياته کړې، چې په هيواد کې د دقيقې او معياري سر شميرنې لپاره له ۱۲۰ څخه تر ۱۵۰ ميليونه ډالرو ته اړتيا ده.
دې ادارې د تېر لمريز کال (۱۴۰۱) پر مهال د هيواد د نفوس وده ۲.۱۴ بللې وه او د هيواد ټول نفوس يې ۳۴.۳ ميليونه تنه ښودلی و چې ۱۷.۵ ميليونه يې نارينه او ۱۶.۸ ميليون يې ښځې اټکل شوې وې.
د احصايې ادارې د تېر کال له خپرو کړیو شمېرو سره سم، د افغانستان ۷۰.۶۰ سلنه نفوس په کليو او ۸.۶ ميليونه وګړي چې ۲۵ سلنه کېږي، په ښارونو کې ژوند کوي.
له دې شمېرو سره سم، د افغانستان ۴۷.۵ سلنه نفوس تر ۱۵ کلنۍ ټيټ عمر لري او دې شمېرو ته په پام افغانستان د ځوان نفوس درلودونکی هیواد دی. د دې ادارې په وينا، د افغانستان ۴۹.۷ سلنه نفوس د کار په عمر کې دی.
د يادونې وړ ده چې د افغانستان نفوس تر اوسه په اټکلي توګه اعلانېږي.
