اطلاعات روز: د ملګرو ملتونو د ماشومانو د ملاتړ صندوق (یونیسف) وايي، چې د روان کال په جنورۍ میاشت کې په افغانستان کې د سختې تنفسي ناروغۍ ۱۶۰ زره پېښو راپور ورکړل شوی دی.
دې ادارې په یوه راپور کې چې په دې وروستیو کې یې په خپله وېبپاڼه کې خپور کړی، لیکلي چې دا شمېره د تېر کال د همدې مودې په پرتله ۱۶ سلنه زیاتوالی ښيي.
یونیسف ویلي، چې په سلو کې ۶۲ سلنه ناروغان له پنځو کلونو کم عمره ماشومان دي.
د دغه راپور له مخې، ډېره سړه هوا او ککړتیا په افغانستان کې د سختې تنفسي ناروغۍ اصلي لاملونه دي.
د دې بنسټ په راپور کې ویل شوي، چې په ژمي کې د افغانستان په ډېرو سیمو کې د هوا تودوخه له صفر څخه ښکته وي، چې له امله یې ماشومان په تنفسي ناروغیو اخته کېږي.
یونیسف زیاته کړې، چې په افغانستان کې د سختې تنفسي ناروغیو د زیاتوالي د مخنیوي په موخه یې د نړیوال بانک په مرسته روغتیايي مرکزونو ته طبي توکي او تودوخه تولیدونکي مواد ویشلي دي.
دغه بنسټ ویلي، چې د نړیوال بانک او د اسیا پراختیايي بانک په مرسته به د ۲۴۰۰ روغتیايي مرکزونو د فعالیت لګښت او د ۲۷ زره روغتیايي کارکوونکو معاش به ورکړي.
یونیسف ویلي، چې تېر کال په افغانستان کې د دې سازمان د کارکوونکو او روغتیايي مرکزونو ملاتړ د دې لامل شو چې څه باندې شل میلیونه ماشومان او د هغوی کورنۍ له روغتیايي او تغذیې خدماتو برخمن شي.
