اطلاعات روز: په کابل کې د ايران د سفارت سرپرست او ځانګړي استازي حسن کاظمي قمي وايي چې د دوحې تر غونډې وړاندې يې د چين، پاکستان او روسيې له ځانګړو استازو سره «مهمه غونډه» درلوده.
ښاغلي قمي نن (يکشنبه، ۲۹ د سلواغې) تر ماشپين وروسته پر ايکس ليکلي چې «تېره مياشت په کابل کې تر ليدنې وروسته مو» د دې غونډې پر مهال «د دوحې تر غونډې وړاندې وضعيت وارزاوه».
د ايران ځانګړي استازي زياته کړې: «مشترکه مسله؛ د افغانستان خلګ، جمعي امنيت او هغه پروسه ده چې وکولای شي د خلګو امنيت، ثبات او همدا راز رفاه تضمين کړي.»
ده ويلي چې د «سيمهييز تماس کمېټه» په دې غونډه کې مهمه او اغېز لرونکې پروسه ده.
ايران وايي چې د «سیمهييز تماس کمېټه» يې د افغانستان په مسله کې د سيمهييزو هيوادونو د همغږۍ لپاره را منځ ته کړې او که د هيوادونو له لوري د دې کميټې مسير تعقيب شي، په افغانستان کې د ثبات لامل کېږي.
د ايران استازی يو څه موده وړاندې د «افغانستان د سيمهييزې همکارۍ د نوښت غونډه» تر عنوان لاندې په کابل کې د طالبانو د بهرنيو چارو د وزارت په کوربتوب او د بېلابېلو هيوادونو د استازو په ګډون شوې غونډه، د سيمهييز تماس د ډلې لومړۍ ناسته ګڼي.
تر دې وړاندې د افغانستان لپاره د روسيې ځانګړي استازي هم ويلي و چې د دوحې په غونډه کې د خپل هيواد شريکان سم لور ته رهبري کوي.
د افغانستان په چارو کې د هيوادونو د ځانګړو استازو غونډه نن د ملګرو ملتونو په کوربتوب په دوحه کې روانه ده.
د ايران ځانګړي استازي همدا راز پر ايکس ليکلي چې د دې غونډې تمرکز پر دې دی: «د نړيوالو پروسو لپاره جمعي تصميم د ټولو اړخونو په مشوره او غير تحميلي وي، د افغانستان موضوعي لومړيتوبونه ته پکې پام وشي او پرېکړي د افغانستان، ګاونډيانو، سيمې او نړيوال چاپېريال د متقابلو او مشروعو اړيکو پر اساس وي.»
طالبانو په دې غونډه کې د ملګرو ملتونو له لوري د دوی د شرطونو د نه منل کېدو له وجې ګډون نه دی کړی.
له راپورونو سره سم، د افغانستان د مدني ټولنې او ښځو په استازيتوب په دې غونډه کې درو ښځو او يوه نارينه ګډون کړی دی.
