اطلاعات روز: په کابل کې د ايران سفير او ځانګړي استازي حسن کاظمي قمي وايي چې د طالبانو حکومت په دوحه کې د هيوادونو د استازو په غونډه کې د خپل ګډون لپاره دوه «مهم شرطونه» اعلان کړي دي.
ده نن سهار (چهارشنبه، ۲۵ د سلواغې) د طالبانو د شرطونو په اړه له وضاحت ورکولو پرته پر ايکس وليکل: «ښه فرصت دی تر څو معلومه شي چې د غونډې له اهدافو سره سم د تعامل لپاره د “منصفانه لارې” د پيدا کولو هڅې څومره جدي دي؟»
قمي زياته کړې چې که «د سيمهييز تماس د کميټې مسير ته پاملرنه وشي او د تعامل مسير تعقيب شي، يو باثباته افغانستان به ولرو.»
د طالبانو وياندويانو د دوحې په غونډه کې د دې ډلې د ګډون کولو د تصميم په تړاو څه نه دې ويلي.
تر دې وړاندې د طالبانو چارواکو اعلان کړی و چې دې غونډې ته بلل شوي دي، خو د خپل ګډون په اړه به پرېکړه کوي. دې ډلې د غونډې د اجنډا او جوړښت په اړه د وضاحت غوښتنه کړې.
ټاکل شوې ده چې د افغانستان په چارو کې د هيوادونو د ځانګړو استازو دويمه غونډه د راتلونکې اونۍ د يکشنبې او دوشنبې په ورځو په دوحه کې جوړه شي.
دا غونډه د ملګرو ملتونو د عمومي منشي آنتونيو ګوتريش په کوربتوب جوړېږي او د ملګرو ملتونو د امنيت شورا له ۲۷۲۱ پرېکړهليک سره سم پکې د «افغانستان د خپلواکې ارزونې» وړانديزونه ارزول کېږي.
د ايران سفير او استازي تر دې وړاندې هم د دې غونډې په اړه ويلي و چې ګاونډي او د سیمې هيوادونه د افغانستان له ثبات سره د مرستې په موخه له طالبانو سره د همکارۍ او تعامل په لټه دي.
دا په داسې حال کې چې د امريکا د بهرنيو چارو وزارت ویاند ميتو ميلر د دوحې د غونډې په اړه ويلي چې دا هيواد د افغانستان په چارو کې د ځانګړي استازي د ټاکلو په اړه د ملګرو ملتونو د امنيت شورا د پرېکړهليک د غوښتنې کلک ملاتړ کوي او د ملګرو ملتونو له عمومي منشي غواړي چې هر څومره ژر کېږي، دا استازی دې وټاکي؛ هغه موضوع چې طالبان ورسره مخالف دي.
د يادونې وړ ده چې د افغانستان په چارو کې د روسيې ځانګړي استازي ضمير کابلوف هم يو څه موده وړاندې د افغانستان په اړه د دوحې د غونډې په تړاو ويلي و چې د خپل هيواد شريکان به د «سم چلند» لور ته رهبري کوي.
بل لور ته د ښځينه معترضينو په شمول د ښځو د حقونو يو شمېر فعالان د دوحې په غونډه کې د طالبانو له حضور سره مخالف دي او دا له طالبانو سره د اړيکو د عادي کولو غونډه بولي.
