په پکتيکا ولايت کې ځايي خلک د وحشي ژويو او مرغانو د ښکار له امله اندېښنه څرګندوي او وايي، د ژمي په راتګ سره د دغه ولايت په ځينو سيمو کې لاهم ښکاريان د روزل شويو سپيو او ښکاري ټوپکو په ذريعه ښکار کوي.
پکتيکا چې غرنيز ولايت ګڼل کېږي، د ژمي موسم پر مهال ښکاريان غرونو ته د ښکار کولو لپاره ځي او هلته د مختلفو مرغانو او وحشي ژويو د رانيولو هڅه کوي.
د ياد ولايت لپاره د طالبانو د چاپيريال ساتنې رياست مسوولينو بيا ويلي، چې د ناقانونه ښکار د مخنيوي لپاره يې له امنيې قومندانۍ د همکاري غوښتنه کړې ده.
د پکتيکا خلک وايي، په مرکز ښرنې، ارګون، خيرکوټ، برمل او ځينو نورو ولسواليو کې د مرغانو او بېلابېلو وحشي ژويو نيولو او قاچاق اندېښمن کړي او د چاپيريال لپاره يې په زيان بولي.
د ښرنې ښار اوسېدونکی رقيب الله وايي، په لېرې پرتو سيمو کې د واورو پر مهال ځوانان غرونو ته ځي او هلته د ښکاري ټوپکو او يا هم د روزل شويو سپيو پرمټ وحشي ژوي رانیسي او يا يې هم په بې رحمانه ډول له منځه وړي.
نوموړی زياتوي، چې د پکتيکا ولايت په غرونو کې زيات ډوله مرغان او وحشي ژوي شته، چې اوس يې د ناقانونه ښکار له امله زياته برخه له منځه تللي او يا هم له دغو سيمو او غرونو نورو ولايتونو ته کوچېدلي دي.
رقيب الله اطلاعات روز ته وويل: «کله چې د دلوې مياشت را پېل شي او واورې و وريږي، نو زمونږ د پکتيکا ولايت په ځينو سيمو کې ځوانان له ښکاري ټوپکو او تازي سپيو سره يو ځای غرونو ته ځي او هلته د مرغانو، زرکو او يا د نورو ګېدړو، غرڅو او نورو ژويو ښکار کوي، چې دا دغې سيمې ته په زيان دی.»
په دغه ولايت کې ځينې خلک د مرغانو او وحشي ژويو د قاچاق له امله هم اندېښمن دي او وايي، ځينې خلک د پيسو په بدل کې ګاونډي پاکستان ته مرغان او وحشي ژوي قاچاقوی.
دوی وايي، د طالبانو د چاپيريال ساتنې رياست تر اوسه د ناقانونه ښکار او قاچاق مخنيوی لپاره هڅی نه دي کړې او ټينګار کوي چې په دې برخه کې خپل مسووليت ادا کړي.
د ارګون ولسوالۍ د پوښتۍ سيمې اوسېدونکی عزيزالله له اطلاعات روز سره په خبرو کې د ناقانونه ښکار لپاره د سيمه ييزو تړونونو عملي کېدل اړين بولي او وايي، چاپيريال ساتنې رياست او ښکېلې نورې ادارې نه شي کولای چې د سيمې د خلکو له همکارۍ پرته د ښکار مخنيوی وکړي.
ښاغلي عزيز الله داسې وویل: «د ښکار مخنيوی يا د وحشي ژويو ساتنه دا چاپيريال ساتنې رياست او يا هم قومنداني نه شي کولای، ځکه هغوی چېرته د واورو په موسم کې لېرې ولسواليو ته لاسرسی لري، خو ښه لاره يې دا ده چې قومي ناغې بايد ولګول شي لکه چې د ځنګلونو په برخه کې شوې نو بيا جرات نه شي کولای چې يو څوک دې ښکار وکړي.»
د پکتيکا خلک وايي، په تېرو دوو لسيزو کې د جګړو له امله د وحشي ژويو او مرغانو ډېره برخه پاکستان ته کوچېدلي وو، خو له تېرو دوو کلونو راهيسی يو ځل بيا په غرونو کې د دغو ژويو شمېر زيات شوی دی.
د پکتيکا ولايت لپاره د طالبانو د چاپيريال ساتنې رياست چارواکو بيا په يوې خبرپاڼه کې د ناقانونه ښکار او قاچاق مخنيوي لپاره له امنيې قومنداني د همکارۍ غوښتنه کړې ده.
دغه رياست په يوې خبرپاڼه کې ويلي، چې څو ورځې وړاندې د طالبانو د چاپيريال ساتنې ريیس سجاد خان وقاص او کاري ټيم يې له امنيې قومندان سره د ليدنې پرمهال د ښکار مخنيوي او ښکاريانو سره د قانوني چلند لپاره همکاري غوښتې ده.
خبرپاڼه کې راغلي چې امنيې قومندانۍ هم د ښکار په اړه د خپل مشر ملا هبت الله اخوندزاده د فرمان عملي کولو لپاره چاپيريال ساتنې رياست ته د هر راز همکارۍ ډاډ ورکړی دی.
د پکتيکا ولايت سربېره د هيواد په ګڼو نورو ولايتونو کې هم د مرغانو او وحشي ژويو له ناقانونه ښکار شکايتونه شوي او د طالبانو له حکومت څخه يې د مخنيوي غوښتنه هم شوې ده.
