اطلاعات روز: د افغانستان په چارو کې د روسيې ځانګړي استازي ضمير کابلوف ويلي، چې د افغانستان په تړاو د دوحې په ناسته کې د خپل هيواد شريکان «سم لوري» ته رابولي.
ښاغلي کابلوف دا موضوع پرون (جمعه، ۲۰ د سلواغې) د «ټاس» خبري اژانس د پوښتنې په ځواب کې مطرح کړې، خو په دې اړه يې زيات وضاحت نه دی ورکړی.
ټاکل شوې چې د افغانستان په چارو کې د هيوادونو د ځانګړو استازو دويمه غونډه د راتلونکې اونۍ د يکشنبې او دوشنبې په ورځو په دوحه کې جوړه شي.
دا غونډه د ملګرو ملتونو د عمومي منشي انټونيو ګوتريش په کوربتوب جوړېږي او د ملګرو ملتونو د امنيت شورا له ۲۷۲۱ پرېکړهليک سره سم د «افغانستان د خپلواکې ارزونې» وړانديزونه په کې ارزول کېږي.
همدا راز په دې غونډه کې د هيوادونو ځانګړي استازي د افغانستان په چارو کې د ملګرو ملتونو د ځانګړي استازي د ټاکلو په اړه غور کوي.
طالبانو اعلان کړی چې دې ډلې ته په غونډه کې د ګډون بلنه ورکړل شوې، خو تر اوسه يې په کې د ګډون په اړه تصميم نه دی نيولی.
معلومه نه ده چې له طالبانو پرته د افغانستان نورو کومو سياسي ډلو او څېرو ته په دې غونډه کې د ګډون بلنه ورکړل شوې ده.
