اطلاعات روز: د ملګرو ملتونو د بېړني غبرګون مرکزي صندوق (سي ای آر ايف) ۳.۸ ميليونه امريکايي ډالر له پاکستانه جبري راستنېدونکو ته ځانګړي کړي دي.
د خوړو نړيوال پروګرام د يوې اعلاميې په خپرولو سره ويلي، چې په دې بودیجې سره کولای شي د يوې مياشتې لپاره ۳۳ زره کورنيو او يا هم د معلوليت لرونکو وګړو په ګډون تر ۲۳۰ زره زياتو هغو ماشومانو، ښځو او نارينهوو سره نغدي مرسته وکړي چې افغانستان ته په ستنېدو مجبور شوي دي.
په افغانستان کې د ملګرو ملتونو د بشري مرستو د همغږۍ د دفتر (اوچا) رييسې ايزابيل موسارد کارلسن ويلي، چې د دې سازمان د بېړني غبرګون د مرکزي صندوق مالي مرسته په سخت ژمي او د خوراکي ناامنۍ په اوج کې د زرګونو راستنېدونکو لپاره د ژغورنې لار ده او د هغوی بېړنۍ خوراکي اړتياوې پوره کوي.
د خوړو نړيوال پروګرام ويلي، چې راستنېدونکې کورنۍ په بدترين وخت کې افغانستان ته ستنېږي ځکه چې لوږه پر زياتېدو ده او بشرپالې مالي مرستې په تر ټولو ټيټه کچه کې دي.
دې پروګرام زياته کړې، چې تېر کال د بودیجې د کمښت له کبله اړ شوي چې خوراکي مرستې کمې کړي او له کبله يې ۱۰ ميليونه وګړي اغېزمن شول.
د خوړو نړيوال پروګرام ويلي، چې د ۲۰۲۳ کال پر مهال يې ټولټال ۲۹.۰۳ ميليونه ډالر تر لاسه کړي او په دې پيسو سره يې په هرات ولايت کې له زلزله ځپلو او تر ۲۰۰ زره زياتو متضررو وګړو سره خوراکي يا نغدي مرستې کړې دي.
