اطلاعات روز: يو شمېر معترضو ښځو د دوحې په راتلونکې غونډه کې طالبانو ته بلنه ورکول او له دې ډلې سره د اړيکو عادي کول غندلي او ويلي يې دي چې «طالبانو د مذاکراتو نه، بلکې محاکمې وړ دي».
دې ښځو د دوحې په غونډه کې د طالبانو د مخالفينو او ښځينه استازو له ګډون سره هم مخالفت کړی او ويلي يې دي چې معترضې ښځې بايد له طالبانو سره د مذاکراتو پر ځای د هغو پر محاکمه کېدو ټينګار وکړي.
د دې ښځو له لوري په خپره شوې اعلاميه کې راغلي: «لازمه ده چې په صراحت سره اعلان وکړو چې هيڅوک هم په هيڅ غونډه او ځای کې طالبانو ته د مشروعيت ورکولو په لړ کې د ښځو او ښځينه معترضينو له ادرسه استازيتوب نه شي کولای.»
د طالبانو پر خلاف د معترضو ښځو دې ډلې خبرداری ورکړی چې که هر څوک د دوحې په غونډه کې د معترضو ښځو د استازي په توګه ګډون کوي، مبارزه بې لارې کوي.
د معترضو ښځو دې ډلې ويلي، چې هغوی «به د طالبانو مخ ته يوازې د مبارزې په ژبه ورځي، نه د مذاکرې».
دوی زياته کړې، چې ښځې د طالبانو د سيسټماټيک اپارتايډ د قربانيانو په توګه دا ډله په نړيوالو عدالت تطبيقوونکو محکمو کې د محاکمې وړ بولي.
ټاکل شوې چې د افغانستان په چارو کې د هيوادونو د ځانګړو استازو دويمه غونډه د روانې ميلادي مياشتې پر ۱۸ او ۱۹مو نېټو د ملګرو ملتونو په کوربتوب په دوحه کې جوړه شي.
طالبان وايي، چې دې غونډې ته وربلل شوي دي، خو د اجنډا له تر لاسه کولو وروسته به په غونډه کې د خپل ګډون په اړه پرېکړه وکړي.
د دې غونډې ټول ګډونوال لاهم نه دې اعلان شوي.
دا غونډه چې د ملګرو ملتونو د امنيت شورا له ۲۷۲۱ پرېکړهليک سره سمه جوړېږي، د ملګرو ملتونو د همغږي کوونکي فريدون سينيرلي اوغلو له لوري د «افغانستان د خپلواکې ارزونې» د چمتو شوي راپور وړانديزونه په کې ارزول کېږي.
د افغانستان په چارو کې د ملګرو ملتونو د عمومي منشي د ځانګړي استازي د ټاکلو په اړه بحث د دوحې د غونډې برخه ده.
