اطلاعات روز: د «افغانستان د ښځو اعتراضي غورځنګونو» ملګرو ملتونو ته په يوه پرانيستي ليک کې په دوحه کې د افغانستان په اړه د هيوادونو د ځانګړو استازو په دويمه غونډه کې د طالبانو د مخالفينو په ځانګړې توګه د ښځينه معترضينو د پراخ حضور غوښتنه کړې.
دا پرانيستی ليک پرون (چهارشنبه، ۱۱ د سلواغې) ملګرو ملتونو ته ليږل شوی چې په دوحه کې د افغانستان په اړه د هيوادونو د ځانګړو استازو د دويمې غونډې کوربتوب کوي.
په دې ليک کې ويل شوي: « د ښځو د اعتراضي خوځښتونو استازې بايد د افغانستان د کړکېچ په تړاو په ټولو نړيوالو غونډو کې د طالب ترهګرو، نسل وژنې او روان جنسيتي اپارتايډ پر وړاندې د قوي مبارزينو په توګه موجودې وي.»
د معترضو ښځو خوځښتونو په دې ليک کې ويلي، چې د طالبانو د باصلاحيته مخالفينو د استازو حضور ته د هر ډول نه پاملرنې په صورت کې به د دې غونډو پايلې د افغانستان خلکو ته د منلو وړ نه وي او د بشري حقونو او د ښځو د حقونو وضعيت به نور هم بدتر کړي.
دوی له ملګرو ملتونو غوښتي چې د افغانستان د وضعيت په ځانګړي توګه د بشري حقونو او ښځو د حقونو په اړه مسوولانه چلند وکړي او د افغانستان د ښځو پر وړاندې دې د دې سازمان اعتبار وساتي.
ټاکل شوې چې د افغانستان په چارو کې د هيوادونو د ځانګړو استازو غونډه د ملګرو ملتونو په کوربتوب د روانې فبروري مياشتې پر ۱۸ او ۱۹مو نېټو په دوحه کې جوړه شي.
لاهم څرګنده نه ده چې له افغانستان څخه څوک دې غونډې ته بلل شوي دي، خو د طالبانو د رییس الوزرا سياسي مرستيال مولوي عبدالکبیر ويلي، چې دا ډله دې غونډې ته بلل شوې ده.
د افغانستان يو شمېر نورو سياسي ډلو هم له ملګرو ملتونو غوښتي چې دوی دې غونډې ته ور وغواړي.
