اطلاعات روز: په خوست ولايت کې د حمامونو يا سلمانيانو مالکان وايي، دوی ته د طالبانو امر بالمعروف رياست خبرداری ورکړی، چې د خلکو د سټايلي وېښتانو له جوړولو دې ډډه وکړي.
د دوی په وينا چې له دې وړاندې ورته د ږيرو نه جوړولو سپارښتنه شوې وه او تېره ورځ (یکشنبه، ۲۴ د مرغومي) يې پرې د سټايلي وېښتانو په نه جوړولو هم ټينګار کړی دی.
په دغه ولايت کې د يوې سلماني مالک چې نه يې غوښتل نوم يې څرګند شي، اطلاعات روز ته په دې پرېکړه اندېښنه څرګنده کړه او ویې ويل، چې د وېښتانو جوړل يې د ګټې وټې يوازينۍ لاره ده او غوښتنه يې وکړه چې په دې برخه کې دې پر دوی لګول شوي محدودیتونه راکم کړي.
د طالبانو امر بالمروف او نهې عن المنکر محتسبينو د هيواد په ګڼو ولايتونو کې په خلکو د نورو بنديزونو سربېره د خوښيو په مراسمو کې په موسيقۍ او ږيرې خريولو هم بنديز لګولی، خو د طالبانو په ليکو کې د اوږدو وېښتانو په مخنيوي لاهم نه دي بريالي شوي.
