اطلاعات روز: ننګرهار کې د طالبانو سیمه ییز چارواکي وایي، چې دغه ولایت ته د نورو کلونو په پرتله په سږني ژمي کې د کورنیو او بهرنیو سیلانیانو ورتګ زیات شوی دی.
د ننګرهار د اطلاعاتو او کلتور ریاست لپاره د طالبانو د اطلاعاتو آمر صدیق الله قریشي د معلوماتو له مخې، په روان ژمې کې تر دا مهاله شاوخوا ۱۰۰زرو کورنیو سیلانیانو چې د افغانستان د بېلابېلو ولایتونو استوګن وو، دغه ولایت ته سفر کړی دی.
قریشی ننګرهار ته د سیلانیانو د پام اوښتو لامل په دغه ولایت کې د ژمي په موسم کې معتدله هوا، د امنیت ټینګښت، د تاریخي ځایونو شتون او د دوی له لوري سیلانیانو ته د لازمو اسانتیاوو برابرول یادوي.
نوموړی ټینګار کوي او وايي، هڅې یې پېل کړي، چې د اسانتیاوو په رامنځته کولو سره به پر کورنیو سیلانیانو سربېره، د بهرني سیلانیانو پام هم دغه ولایت ته را واړوي.
د نوموړي په خبره دره نور، کامه، خوږیاڼي، لعلپوره، بټي کوټ او شینواري هغه ولسوالۍ دي، چې سږکال ورته په زیاته کچه کورني سیلانیان ورغلي دي.
د ننګرهار شمال ختیځ لورته د کامې ولسوالۍ د پاکې هوا، د کونړ سیند مستو څپو، کبانو، ګوړې ګاڼۍ، شیریخ او ښکلو منظرو له امله مشهوره ده.
یادې ولسوالۍ ته له لېرې ځايونو خلک د مېلو، منظرو او سيل لپاره ورځي.
سید ناصر له خپلو ملګرو سره د کندهار ولایت څخه کامې ولسوالۍ ته په چکر ورغلی وایي، دا یې لومړی ځل دی چې ننګرهار او بیا د کامې ولسوالۍ ته سفر کوي.
نوموړی د طالبانو له حکومت څخه د هیواد په بیلابیلو ولایتونو کې د لازمو اسانتیاوو د برابریدو غوښتنه کوي.
دغه راز د کامې ولسوالۍ ځايي خلکو د سيند پر غاړه د سيلانيانو د ناستې او مېلې لپاره ځايونه جوړ کړي چې کپه يې بولي.
دوی دغه کپې د يوې ورځې او یا څو ساعتونو لپاره سیلانیانو ته په کرايه ورکوي او نږدې دغه کار يې کاروبار ګرځېدلی دی.
نادر خان چې د کونړ سیند پر غاړه یې د سیلانیانو لپاره دا ډول ځانګړي ځایونه جوړ کړي وایي، د طالبانو د حکومت په راتګ او تفریح ځایونو ته د ښځو پر ورتګ له بندیز سره یې کاروبار کمرنګه شوی دی.
بلخوا په ننګرهار کې د طالبانو د امر بالمعروف ریاست چارواکو ویلي، چې عمومي پارکونو ته یې ځکه د مېرمنو د ورتګ مخه نیولې چې د دوی په خبره مېرمنو اسلامي اصول او افغاني دود او فرهنګ په پام کې نه نیوه.
