اطلاعات روز: پاکستانۍ ورځپاڼې ایکسپریس ټریبیون ليکلي چې داسې راپورونه شته چې د جمعیت علماء اسلام ګوند مشر مولانا فضل الرحمان افغانستان ته د سفر پر مهال د «تحریک طالبان پاکستان» له مشر نور ولي محسود او د «تحریک جهاد پاکستان» په نوم له ټي ټي پي د بېلي شوې ډلې له مشر حافظ ګل بهادر سره ليدلي دي.
د دې رسنۍ له راپور سره سم، دا ليدنې جلا – جلا ترسره شوې دي.
دې رسنۍ زياته کړې چې طالبانو او د پاکستان د جمعیت علماء اسلام ګوند دا ليدنې نه دې تاييد کړې.
د پاکستان دولت د تحریک طالبان پاکستان په نوم ډله يوه «تروریستي» ډله بولي او تر اوسه يې له طالبانو په ځلونو غوښتي چې په افغانستان کې د دې ډلې د رهبرانو پر ضد دې اقدام وکړي.
همدا راز دې هيواد له طالبانو د حافظ ګل بهادر د نيولو او پاکستان ته يې د سپارلو غوښتنه کړې.
طالبانو تر اوسه په افغانستان کې دننه د دې کسانو حضور نه دی منلی او د ټي ټي پي د غړو شتون يې د «وزيرستاني کډوالو» په نوم تاييد کړی دی.
مولانا فضل الرحمان د تېرې اونۍ د يکشنبې په ورځ د يوه لوړپوړي پلاوي په مشرۍ کابل ته راغی او د سفر موخه يې د طالبانو او پاکستان تر منځ د ناسم پوهاوي ختمول و.
ده په کابل کې له طالب چارواکو سره د ليدنې تر څنګ په کندهار کې د دې ډلې له مشر هبت الله آخوندزاده سره هم وليدل، خو د دې ليدنې په اړه دواړو لورو کوم جزييات نه دې خپاره کړي.
د پاکستان د بهرنيو چارو وزارت د مولانا فضل الرحمان سفر يو «شخصي» سفر بللی او ويلي يې دي چې دا سفر له دې هيواد سره کومه اړه نه لري.
خو د ایکسپریس ټریبیون په راپور کې د ځينو سرچينو له خولې ويل شوي چې مولانا فضل الرحمان به له سفره تر راستنېدو وروسته په دې اړه پاکستاني چارواکو ته معلومات ورکړي او د دې هيواد چارواکي «لېواله» دي چې د طالبانو له مشر سره د ده له ليدنې خبر شي.
دې رسنۍ په خپل راپور کې زياته کړې چې د طالبانو مشر له مولانا فضل الرحمان سره په ليدنه کې وړانديز کړی چې د پاکستاني چارواکو او د دې هيواد د تحریک طالبان تر منځ خبرې د قطر د دفتر په شمول د دې ډلې په دفترونو کې کېدلای شي.
مګر پاکستاني دولت په دې وروستيو کې په ټينګار ويلي چې د دې هيواد له تحریک طالبان ډلې سره خبرو ته چمتو نه دي او له طالبانو يې غوښتي چې دې ډلې ته دې اجازه نه ورکوي چې د پاکستان پر خلاف د افغانستان خاوره وکاروي.
