اطاعات روز: ايراني رسنيو د دې هيواد د کرمان ولايت د ايمرجنسي د رييس له خولې راپور ورکړی چې نن (چهارشنبه، ۱۳ د مرغومې) مازيګر د قاسم سليماني د څلورم تلين په مراسمو کې دوو چاودنو ۱۰۳ تنه وژلي دي.
ايرنا خبري اژانس د کرمان ولايت د ايمرجنسي د رييس په وينا ليکلي چې په دې چاودنو کې ۱۴۱ تنه ژوبل شوي دي.
د کرمان د ايمرجنسي رييس ويلي چې د ځينو ژوبلو کسانو وضعيت وخيم دی.
وړاندې ايرنا راپور ورکړی و چې په دې چاودنو کې ۷۳ تنه وژل شوي او ۱۷۱ نور ژوبل دي.
د ايران د کورنيو چارو وزير احمد وحيدي ويلي چې لومړۍ چاودنه نن تر ماشپين وروسته پر درې بجې او دويمه چاودنه پر ۳:۲۰ بجې هغه مهال وشوه چې خلګ د لومړي چاودنې د ژوبلو کسانو مرستې ته ور ودانګل.
ده زياته کړې چې زياتره تلفات د دويمې چاودنې په ترڅ کې پېښ شوي.
د ايران د کورنيو چارو وزير ويلي چې اوس مهال په کرمان ښار کې وضعيت عادي او د دې هيواد د امنيتي ځواکونو تر کنټرول لاندې دی.
ده ټينګار کړی دی چې «دا تروريستي اقدام» به د ايران د امنيتي ځواکونو له «ځپونکي او سخت» غبرګون سره مخ شي.
دا چاودنې نن مازيګر داسې مهال شوې دي چې په سلګونو تنو د کرمان په «ګلزار شهدا» نومې سيمه کې د سپاه پاسداران ځواک د پخواني قومندان قاسم سليماني د مړينې په څلورم تلين کې ګډون کړی و.
د ايرنا خبري اژانس له وينا سره سم، لومړۍ چاودنه د قاسم سليماني د ښخېدو د ځای په ۷۰۰ مترۍ او دويمه په يو کيلوميترۍ کې وشوه.
د کرمان د امنيتي والي مرستيال ويلي چې دا ترهګرې چاودنې وې.
تر اوسه هيڅ ډلې او يا هم کوم کس د دې چاودنو مسووليت نه دی منلی.
قاسم سليماني څلور کاله وړاندې په عراق کې د امريکا د بې پيلوټه الوتکې په بريد کې ووژل شو.
