اطلاعات روز: لغمان کې د رسنیو له ولايتي دفتره په خپره شوې خبرپاڼه کې راغلي چې د دې ولایت د پېښو پر وړاندې د مبارزې او چمتووالي ریاست له شپږ زره او ۶۹۹ اړمنو کورنیو سره د ٧٩ میلیونه او ٧٧٣ زره افغانیو نغدي او د خوراکي توکو مرسته کړې ده.
دا خبرپاڼه چې نن (چهارشنبه، ٢٢ د لېندۍ) خپره شوې، پکې راغلي چې په دې کورنيو کې له درو زرو او ۴۱۸ کورنیو سره نغدي او له يو زر او ۶۰۰ کورنیو سره د خوراکي توکو مرسته شوې ده. د خبرپاڼې په وينا، له پاتې کورنيو سره په ګڼو نورو برخو کې مرستې شوې دي.
خبرپاڼه زياتوي چې دا مرستې پر هغو کورنیو ویشل شوې دي چې د روان ۱۴۰۲ لمریز کال په پیل کې د بېلابېلو طبیعي پېښو له امله زیانمنې شوې وې.
همدا راز، د ننګرهار د رسنيو له دفتره په خپره شوې خبرپاڼه کې ويل شوي چې تېره ورځ د کډوالو چارو او معلولینو ریاستونو په هڅو IOM موسسې او د معلولینو لپاره بشري خیریه موسسې پر ٩٣٧ کونډو، معلولینو او کډوالو مرستې وېشلې دي.
خبرپاڼه زیاتوي، له هرې کډوالې کورنۍ سره د ديارلس زره او ۸۰۰ افغانیو نغدي او د يوه هايجن او د ژمنيو توکو د یوه کيټ مرسته شوې. همدا راز، هرې کونډې، بیوزلې او معلولې کورنۍ ته دوولس زره او۵۸۵ افغانۍ نغدې ورکړل شوې دي.
