اطلاعات روز: ننګرهار کې طالب چارواکي خبر ورکوي، چې د اروپايي ټولنې استازو په تورخم کې د افغان کډوالو په پنډ غالي کې له کډوالو سره د هغوی د ستونزو د حل په موخه کتلي دي.
ننګرهار کې د طالبانو د رسنیو له دفتره نن (سې شنبه، ۱۴ د لېندۍ) په خپره شوې خبرپاڼه کې راغلي، چې د اروپایي ټولنې استازو تېره ورځ تورخم ته سفر کړی او هلته یې د بېلابېلو کمېټو له مسوولینو سره د یاد کمپ د اړتیاوو پوره کولو په اړه ناسته کړې ده.
خبرپاڼې زیاته کړې، چې د اروپايي ټولنې استازو له پاکستان څخه د بېرته راستنېدونکو افغانانو لپاره د اسانتیاوو برابرولو برخو کې د هر ډول همکارۍ ډاډ ورکړی.
د افغانستان لپاره د اروپايي اتحاديې استازو دغه راز ویلي، چې ۱۴۳ ميلونه يورو نوې بوديجه يې د افغانستان کډوالو او هرات د زلزله ځپلو ته ځانګړې کړې، چي ډېر ژر به د بشري مرسته کوونکو ادارو له لوري ورسيږي.
ننګرهار کې د طالب چارواکو د معلوماتو له مخې اوسمهال په تورخم کمپ کې د کډوالو لپاره تر ۶۰۰ پورې خیمې درول شوي، چې د لنډمهال لپاره په کې هېواد ته بېرته راستنېدونکي افغان کډوال اوسېږي.
د طالبانو د کډوالو چارو وزارت د معلوماتو پر اساس د نوامبر میاشتې له پېل تر اوسه له پاکستانه څه باندې ۴۵۰ زره افغانان رایستل شوي او دا لړۍ لاهم دوام لري.
په همدې حال کې تازه د امريکا بهرنيو چارو مرستیال وزيرې اسلام آباد ته خپل څلور ورځنی سفر پېل کړی دی.
جوليېټا والز نویېس په داسې حال پاکستان ته سفر کوي، چې د دغه هیواد د پولیسو له لوري د افغان کډوالو نیول زیات شوي او پر کډوالو یې د ژوند کړۍ راتنګه کړې ده.
