اطلاعات روز: په افغانستان کې د اروپايي اتحاديې د استازولۍ سرپرستې رافائیلا ادیس ويلي چې دوی د افغانستان په پلازمېنه او ولايتونو کې ۴۰۰ ښوونځي بيا رغوي.
د طالبانو د پوهنې وزارت د اعلاميې پر اساس، اغلې ادیس پرون (يکشنبه، ۱۲ د ليندۍ) د دې وزارت له سرپرست حبيب الله اغا سره په ليدنه کې ويلي چې د دې ښوونځيو د بيا رغونې بودجه به ډېر ژر يوه همکار بنسټ ته ورکړي.
د طالبانو د پوهنې وزارت په افغانستان کې د اروپايي اتحاديې د استازولۍ د سرپرست په وينا ليکلي چې دوی همدا راز له زده کړو د پاتې ماشومانو لپاره په ټول افغانستان کې محلي ټولګي (سي بي ايس) زياتوي.
د طالبانو د پوهنې وزارت په اعلاميه کې د اغلې اديس له خولې ويل شوي چې له افغانستان سره د اروپايي اتحاديې مرستې مشروطې نه دي.
اروپايي اتحاديې په تازه توګه ويلي چې له افغانستان سره يې د اساسي خدماتو او خلګو د معيشت پياوړي کولو لپاره له افغانستان سره ۱۴۲.۸ ميليون يورو مرسته کړې ده.
د طالبانو د پوهنې وزارت له اعلاميې سره سم، د اروپايي استازولۍ سرپرست ويلي چې دا مرستې د پوهنې برخې ته هم شاملېږي.
د افغانستان په ولايتونو او ليرې پرتو سيمو کې ګڼ ښوونځي ودانۍ او درسي خونې نه لري او زده کوونکي په خلاصه فضا يا هم په خېمو کې درس وايي.
د دې ښوونځيو ودانۍ په داسې مهال کې رغېږي چې د طالبانو له امر سره سم، تر شپږم ټولګي لوړې نجونې له تېرو دوو کلونو راهيسې ښوونځي ته له تللو منعه شوې دي. د ملګرو ملتونو له شمېرو سره سم، د طالبانو د دې امر له وجې تر ۱.۲ ميليون زياتې نجونې په منځنۍ او ليسې دورو کې له زده کړو پاتې دي.
