اطلاعات روز: په خوست ولایت کې د طالبانو مسوولین خبر ورکوي، چې په لومړي ځل د دغه ولایت له سپیرې ولسوالۍ څخه تر پکتیکا ولایت پورې د یو نښلوونکي سړک د رغونې چارې پېل شوې.
دا سړک چې ۲۰ کيلومټره اوږدوالی لري نن (پنج شنبه، ۹ د لیندۍ) یې چارې پېل او د لومړي ځل لپاره به پرې خلک له خوست څخه پکتيکا ولايت ته سفر وکړي.
په خوست کې د طالبانو له ولايت مقام څخه په خپره شوې خبرپاڼه کې راغلي، چې د دغه سړک لپاره ۸ ميليونه افغانۍ ځانګړې شوي او چارې به يې په راتلونکو څو میاشتو کې بشپړې شي.
دا سړک چې اوس په خام ډول رغول کيږي، د طالبانو مسوولین ډاډ ورکوي چې راتلونکي کې به يې د پخېدو چارې هم پېل شي، خو کړه وخت يې نه دی څرګند کړی.
د پکتيکا ولايت اوسېدونکو دا سړک خوست ولايت ته د تګ-راتګ لپاره بولي او وایي، چې له دې وړاندې به يې دغه ولايت ته د پکتيا پر مسير اوږده لار وهله.
دوی زياتوي، چې اوس نه يوازې د تګ برخه کې يې اوږد مزل را لنډيږي بلکې د سپېرې او پر دغه لار د پکتيکا د ځينو ولسواليو د اوسېدونکو شته ستونزې به تر ډېره ورسره هم هوارې شي.
خوست او پکتيکا د هيواد له غرنيو ولايتونو څخه دي، چې ولسواليو ته يې لاهم غځېدلې لويې لارې خامه او پرې تلونکي خلک له ډېرو ستونزو سره مخ دي.
