اطلاعات روز: د روغتيا نړيوال سازمان وايي، چې د روان ميلادي کال د نوامبر مياشتې له ۲۲مې راهيسې يې هغو ۹۲ زره او ۱۳۸ تنو ته روغتيايي خدمات وړاندې کړي چې له پاکستانه افغانستان ته راستانه شوي دي.
دې بنسټ نن (يکشنبه، ۵ د لیندۍ) د يوه راپور په خپرولو سره ويلي، چې دې کسانو ته يې د هيواد په ختيځ، سويل، لوېديځ، سويل ختيځ، شمال او مرکزي سيمو کې روغتيايي خدمات وړاندې کړي دي.
د روغتيا نړيوال سازمان ويلي، چې کومو کسانو روغتيايي خدمات تر لاسه کړي، په هغو کې ۵۶.۲ سلنه يې ښځې دي.
د دې بنسټ له راپور سره سم، د بې اسناده کډوالو او پناه غوښتونکو د ايستلو په تړاو د پاکستان د پرېکړي تر اعلان وروسته د نوامبر تر ۱۸م پورې، ۳۷۴ زره او ۶۰۰ تنه د تورخم او سپين بولدک له لارو افغاانستان ته راغلي دي.
دې بنسټ زیاته کړې، چې په راستنېدونکو کې شاوخوا ۴۸ سلنه يې ښځې دي.
د روغتيا نړيوال سازمان ويلي، چې دې بنسټ له خپلو همکارانو سره هلې-ځلې زياتې کړي او په تورخم او سپين بولدک کې يې دوه بېړني روغتونونه ګټې اخيستنې ته سپارلي دي.
همدا راز دې بنسټ ويلي، چې د ناروغيو د خپرېدو د مخنيوي لپاره راستنېدونکي واکسين کوي او د نوامبر له ۱۲مې نیټې څخه یې بيا تر ۱۸مې پورې په ننګرهار، کندهار، هلمند، زابل، هرات، پکتيکا او کابل ولايتونو کې ۵۳ زره او ۶۷۱ تنو ته د پوليو خوراکي واکسين ورکول شوی دی.
د روغتيا نړيوال سازمان ويلي، له دې هڅو سره-سره له پاکستانه د راستنېدونکو په منځ کې د ناروغيو د خپرېدو خطر او همدا راز د اوبو د کمښت او روغتيايي خدماتو ننګونې شته دي.
دې بنسټ زياته کړې، چې له پاکستانه راستنېدونکو کډوالو او پناه غوښتونکو ته د رسيدګۍ لپاره يې د شپږو مياشتو لپاره د «غبرګون ستراتېژي» جوړه کړې او د ۱۰ ميليونه ډالريزې بودیجې غوښتنه يې کړې.
د روغتيا نړيوال سازمان تر دې وړاندې هم له پاکستانه د راستنېدونکو کسانو ترمنځ د ناروغيو د خپرېدو په تړاو اندېښنه ښودلې وه.
دې بنسټ ويلي و، چې افغانستان ته ډېری راستنېدونکي کسان د خپلو مشخصاتو د ثبتولو لپاره په لنډمهالو پنډغالو کې ساتي چې د ناروغيو د خپرېدو خطر زياتوي.
