اطلاعات روز: د خوست ولايت په مرکز لکڼو سيمه کې قومي مخورو د يوې پرېکړې پر مهال د نجلۍ ولور ۲۵۰ زره افغانۍ ټاکلی او ويلي دي، چې دا اقدام يې د ناوړه دودونو د مخنيوي په موخه ترسره کړی دی.
قومي مشرانو تېره ورځ (یکشنبه، ۲۸ د لړم) د يو پرېکړه ليک په ليکلو سره د ولور سربېره د خوښيو په مراسمو کې د بې ځايه مصارفو او غير شرعي پرېکړو مخنيوی هم کړی او زياته کړې يې ده چې مهر يا ولور به د نجلۍ په اختيار کې ورکول کيږي.
دوی په دغه پرېکړه ليک کې له سرغړونکو سره په مړي او ژوندي د اړيکو پرېکولو ناغه هم ټاکلې ده.
د سيمې اوسېدونکي په اوسنيو اقتصادي ستونزو کې یاده پرېکړه د پام وړ ښه ګام بولي او په نورو سيمو کې يې هم په عملي کیدو ټينګار کوي.
د لکڼو سيمې يو تن قومي مخور حاجي نور ولي وايي، د لوړ ولور او نورو بې ځايه مصارفو له امله يې په کليو او بانډو کې ګڼ ځوانان په ناقانونه لارو تګ ته مجبوره کړل شوي او هڅه کوي چې د دې مصارفو لپاره د مزدورۍ په موخه اروپايي هيوادونو ته لاړ شي.
نوموړي په دغه ولايت کې له نورو قومونو هم غوښتنه وکړه چې د لوړ ولور او نورو بې ځايه مصارفو مخنيوي لپاره دې قومي پرېکړې وکړي.
خوست د لويې پکتيا له هغو ولايتونو دی، چې په ځينو سيمو کې یې د نجلۍ ولور ۹ سوه زره، ۱۵ لکه او يا هم تر ۲۰ لکه افغانيو رسيږي چې دې چارې په ټولنه کې کلتوري ستونزې هم پيدا کړې دي.
