اطلاعات روز: د طالبانو رسنيو خبر ورکړی چې د دې ډلې مشر د نيمروز ولايت په خاشرود ولسوالۍ کې د شاوخوا دوه ميليارده افغانيو په لګښت د اوبو د يو «لوی» بند جوړولو امر کړی دی.
د «ملي ټلويزون» له راپور سره سم، د طالبانو د کليو بيا رغونې او پراختيا وزارت يو مسلکي بورډ جوړوي تر څو د دې بند د جوړولو چارې مخته يوسي.
له دې راپور سره سم، د خاشرود پر سيند تقريبا د ۵۰ مترو په لوړوالي بند جوړېږي چې شاوخوا شپږ ميليونه متر مکعب اوبو د ذخیره کولو ظرفیت به ولري.
د طالبانو تر مديريت لاندې «ملي ټلويزون» ليکلي، چې د دې بند په بشپړېدو سره به د نميروز ولايت په ګلستان، دلارام، خاشرود، غوري او چخانسوري ولسواليو کې اته زره هکټاره ځمکه خړوبه شي.
خاشرود سيند له تور غره سرچينه اخلي او د افغانستان او ايران پر پوله هامون پوزک ته توييږي. دا هامون د هغو هامون حوضونو يوه برخه ده چې د وروستيو کلونو پر مهال وچ شوي. د خاشرود سیند د کلني جریان اوسط اندازه حجم ۱۷۰ میلیونه متر مکعب اټکل شوی دی.
طالبانو په داسې حال کې پر دې سیند د بند جوړولو پرېکړه کړې، چې له ایران سره لاهم د اوبو پر سر شخړې روانې دي.
افغانستان او ايران د ۱۳۵۱ کال پر مهال د هلمند اوبو پر سر تړون لاسليک کړی او د دې معاهدې له مخې په نورمال اوبيز کال کې په يوه ثانيه کې ۲۶ متر مکعبه اوبه د ايران حقابه ده چې له افغانستانه بايد دې هيواد ته ولاړې شي.
اوسمهال ايران وايي، چې خپله حقابه نه ترلاسه کوي، خو په افغانستان کې طالبان وايي چې د پرلپسې وچکاليو له کبله د هلمند اوبه کمې شوې دي.
