اطلاعات روز: په فراه، ننګرهار او دايکندي ولايتونو کې د درو ترافيکي پېښو له امله څلور تنه مړه او درې نور ژوبل شوي دي.
ننګرهار کې د طالبانو ځايي امنیتي چارواکي وایي، چې د دې ولایت په مرکز جلال اباد ښار کې د یوې ترافیکي پېښې له امله دوه کسان مړه او دوه نور ژوبل شوي دي.
د ننګرهار د امنیې قومندانۍ لپاره د طالبانو ویاند عبدالبصیر زابلی وایي، دا پېښه نن (چهارشنبه، ۲۴ د لړم) مازدیګر مهال د جلال اباد ښار د نهمې امنیتي حوزې اړوند «ثمرخېلو» سیمه کې را منځته شوې.
د زابلي په خبره، د پېښې ژوبل کسان د ننګرهار حوزوي روغتون ته لېږدول شوي او روغتیایي حالت یې هم د ډاډ وړ ښودل شوی دی.
نوموړی زیاتوي، چې یاده پېښه کې یوې کرولا موټر د سړک غاړې پلچک سره ټکر کړی، چې لامل یې د موټر چلوونکي بې احتیاطي ښودل شوې.
همدا راز، په فراه کې د طالبانو د والي د دفتر رسنيز مسوول نور احمد خادم وايي چې د دې ولايت په پرچمن ولسوالۍ يوه بار وړونکي ټريلر موټر دوه تنه لاندې کړي چې له امله يې يو تن مړ او يو بل ژوبل شوی دی.
د خادم په وينا، د بار وړونکي موټر چلوونکي د شاتګ پر مهال د بې احتياطۍ له وجې دا دوه تنه تر موټر لاندې کړي. موټر چلوونکی د طالبانو له لوري نيول شوی دی.
همدارنګه، د دايکندي ولايت په خدير ولسوالۍ کې يو «فيلډر» ډوله موټر چې له چلوونکي پرته روښانه و، له لارې اوښتی او يو کس يې لاندې کړی او مړ کړی دی. د ځايي سرچينو په وينا، دا پېښه تېره ورځ شوې.
په هيواد کې ترافيکي پېښې هر کال د سلګونو کسانو ژوند اخلي او په سلګونو نور ژوبل او معلولوي.
يو څه وخت وړاندې د طالبانو د کورنيو چارو وزارت اعلان کړی و چې د تېرو شپږو مياشتو پر مهال ترافيکي پېښو يو زر او ۲۹ تنه مړه کړي دي.
د دې وزارت په وينا، په دې موده کې پر لويو لارو او ښارونو کې دوه زره او ۲۸۸ ترافيکي پېښې شوې دي.
